Les restricciones derivaes de la pandemia pa qu'empreses n'apuros económicos soliciten el concursu d'acreedores tán faciendo que n'Asturies abonde un tipu de compañía que nun ye quien a encarar los sos gastos polos escasos ingresos o porque directamente nun tienen yá actividá. Son empreses conocíes como “zombis”, inviables. Mesmo los alministradores concursales como la patronal asturiana FADE sollerten de qu'esa especie de compañíes ta creciendo con fuerza nel Principáu. Y avisen de que fai falta cortar la hemorraxa cuanto primero meyor porque, como señalen Carlos Caicoya y Alfonso Graíño, vocales de la xunta directiva de l'Asociación Profesional d'Alministradores Concursales (ASPAC), tales empreses “tán infectando a otres sanes”. Estos profesionales dicen tener claro amás que la llei concursal que ta preparando'l Gobiernu nun va ayudar a zarrar la ferida porque omite una de les principales demandes de la patronal: la exoneración de deudes públiques. 

L'Executivu nacional decidió al empiezu de la pandemia aprobar una moratoria concursal. Ún de los oxetivos iniciales d'esti periodu de gracia –qu'en payares decidió ampliase hasta'l próximu 30 de xunu– yera evitar un colapsu nos xulgaos. El Ministeriu d'Economía entendía amás que d'esti xeitu daba osíxenu a compañíes qu'al mediu plazu podíen ser viables, magar les dificultaes al curtiu plazu pola pandemia. 

Había un motivu más: el Ministeriu de Xusticia taba preparando un cambéu completu na llei concursal que, polo que se va conociendo yá, nun convence a les empreses. Ignacio García, director de sofitu corporativu de la Federación Asturiana d'Empresarios (FADE), asegura que'l concursu d'acreedores, talo y como ta plantegáu agora mesmu, supon el zarru pal 90% de les empreses. Porque, sostien García, “nun hai midíes que permitan una reestructuración”. La llei n'ellaboración decepciona a los empresarios, qu'esperaben que, como n'otros países europeos, la regulación incluyera la posibilidá d'exoneración dafechu de deudes acumulaes cola Seguridá Social y Facienda, pa reflotar l'actividá, como yá asocede colos débitos a acreedores privaos.

El Gobiernu evitó finalmente la opción d'una condonación completa de tales deudes públiques, quedándo n'afitar una llende de mil euros nel casu de Facienda y d'otros tantos cuando l'acreedor ye la Seguridá Social. 

La representación de los empresarios asturianos asegura nun entender que nun se considere llegalmente un tipu d'exoneración que resulta “esencial” pa la supervivencia d'actividaes n'apuros. “Nun se trata de que les empreses nun paguen; trátase de que tengan una oportunidá pa siguir viviendo”, señaló Ignacio García. Y axuntó: “Nun entendemos por qué l'enfotu en tratar siempre peor a la empresa en dificultaes”. 

Los alministradores concursales presentaron munches alegaciones al proyectu de llei, pero con escasu ésitu, espón Caicoya. Y cuenta que la exoneración acutada de deudes públiques que va incluyir la futura normativa “nun va sirvir de nada” y va torgar que munches compañíes “que son viables tengan una segunda oportunidá”. La nueva regulación, axunta, tamién debilita la figura del alministrador concursal al contar con que “seya'l mesmu deudor el que liquide los sos activos”. La llei xustifica esi cambéu por que los procesos concursales seyan más rápidos y fluyíos, y evitar asina que se colapsen los xulgaos una vegada que se llevante la moratoria. 

Les empreses sostienen que l'atascu xudicial va ser inevitable. A la fin, avisa Carlos Caicoya, les torgues regulatorias faen abondar un bon númberu de “empreses zombis que ta infectando a otres compañíes, y eso hai que cortalo”. A lo qu'Ignacio García axunta: “El problema ye l'enorme efectu multiplicador de la insolvencia, una bola de nieve que munches vegaes arrampla con otres empreses al abismu”. FADE y los alministradores concursales roblaron fai unes selmanes un pactu p'analizar les posibilidaes de refinanciación d'empreses en crisis. 

Magar el Gobiernu estableció diverses salvaguardes pa evitar que la presentación de los concursos acabe por colapsar los xulgaos –modificó les llendes pa poder solicitar la quiebra, amenorgó la capacidá de los acreedores de forzar el concursu d'un veceru y dio sofitu financieru a los deudores–, a los xulgaos asturianos siguen llegando pidimientos de suspensiones de pagos. La mayoría de les empreses asturianes condenaes al concursu tienen un perfil concretu: más de la metá tien más de seis emplegaos y deudes superiores a los 300.000 euros; l'antigüedá media supera los 12 años; suelen pertenecer al sector servicios, y más d'un 25% tien capacidá abonda p'amortizar les sos deudes en menos de diez años.