“Pegué'l pelotazu estes Navidaes”, esplica Daniel Fernández, uvieín de 34 años al que munchos yá consideren como “l'humorista de la sesta fola”. La fórmula del ésitu del asturianu ye cenciella pero efectiva: somorguia nes redes sociales y busca “influencers” que dan recetes pa ligar, aprender inglés, mercar bien o trunfar nos negocios. L'asturianu tómase al pie de la lletra esos conseyos, apúntalos na so “llibreta sensei” y trata d'aplicalos al personaxe que se creó, un “payasu introvertíu y fracasaducu” pal qu'eses fórmules son de mala aplicación, y esto termina xenerando un cortucircuitu que se traduz en risa. La esplosión, el “pelotazu”, foi enorme. Nuna de les dos redes sociales nes que suel colgar los sos vídeos fixo 180.000 siguidores en diez díes y na otra pasó de tener el 8 d'avientu 2.500 siguidores a tar agora en 325.000. Daniel Fernández, que vive nel barriu d'El Cristu, n'Uviéu, diz tomar la so fama recién “con tranquilidá”, “viviendo'l día a día”.

La busca de la fórmula foi llarga. “Siempre tuvi colos mios vídeos, tuvi la necesidá de crear pa llegar a dalguién, tresmitir daqué, dalgún sentimientu”, señala esti uvieín qu'empezó va siete años cola desaparecida plataforma de vídeos curtios “Vini”: “Empecé con Isaac Corrales, yéramos compañeros, pero cuando cerró yo dexé de facer vídeos y pensé: ‘Esto aguanta y el mio tren pasó’”, esplica. Pero pasó ún más y diose una “mecigaya coses”: “Hai xente que se siente identificada conmigo, depués ta la xente que ta confinada y hubo un chispazu terrible”, cuenta. Unos vídeos que, a pesar de la so pequeña duración, lléven-y trabayu abondo: “Tardo unes dos hores en facer un vídeu d'un minutu”.

Daniel Fernández tien, amás, unes riegles estrictes sobre cómo tienen de ser les sos creaciones: “Ye humor blanco, los vídeos son sobre mi; si nun me sirven pa rime de mi mesmu, refúgolos”. Por eso, l'acoyida ta siendo bona tamién ente los “influencers” que d'aquella manera caricaturiza: “Polo xeneral bien con ellos, dellos empezaron a siguime, pel momento nun tuvi nenguna mala reacción”. Otra de les coses que llogró Daniel Fernández ye dir creando'l so propiu llinguaxe, con términos como “regulinchi” que yá tienen inclusive taces y camisetes. Él, pel momento, reconoz tar “encantáu” con esta popularidá.