El movimientu de fondu ximiélgase dende va dellos años, y ye agora cuando se manifiesta d'un xeitu más claru, calistrando nes distintes escenes, dende la más esperimental hasta la más comercial. Magar, hasta va poco, guitarres eléctriques o sintetizadores podíen representar la modernidá, ábrense pasu agora la zanfoña, la botella d'anís o les voces d'harmoníes ancestrales. Y la copla, el “cant de batre” y el corríu castellán, mandaos de los que los artistes se sirven pa construyir obres rellumantes, ensin mieu a que los acusen de retrógrados o de rurales.
Vémoslo n'artistes como C. Tangana, “Vetusta Morla” y Amaia, qu'allegaron a los legaos tradicionales nos sos nuevos trabayos, magar nada nun ye nuevo, nun escenariu primeramente semáu por creadores que concibieron la so idea de modernidá mirando hacia atrás y hacia adientro: dende'l qu'un día fue cantautor indie xixonés Nacho Vegas hasta la mesma Rosalía col so h.ondo de vanguardia y les sos polifoníes llitúrxiques. D'ehí, al folk de l'Alcarria de “Los Hermanos Cubero”, el music hall con raigaños asturianos (llingua incluyida) de Rodrigo Cuevas, el neoflamencu de la catalana María José Llergo, los palos tradicionales con tratamientu de shock electrónicu de “Maria Arnal i Marcel Bagés”, el rock andaluz (y andalusí) de “Califato ¾”, les eurovisives pandereteres de “Tanxugueiras”, les coples y saetes sicodéliques del dúu madrilanu “Ruiseñora”, el cantar ancestral veníu del futuru de la mallorquina Joana Gomila y la menorquina Anna Ferrer... Esto ye un nun aparar, y lo que va venir.
Ta claro que “se perdieron los complexos y los prexuicios”, y que “yá nun da vergüenza trabayar con materiales tradicionales”, fae Francesc Viladiu, director del veteranu festival “(a)phònica”, de Banyoles, centráu na voz. Na so opinión, manda agora “la busca de la singularidá y del productu de kilómetru cero, que se manifiesta na música de la mesma que nel comerciu o la comida”. El mayor adiestramientu de los músicos mozos del ámbitu popular al respective de los sos mayores, onde apoderaba l'amateurismu, ye otru factor.
Pero ¿de qué falamos cuando falamos de música tradicional? Porque, vamos ver, ¿qué música nun tien pasáu? Quiciabes namás se trate de ver ónde asitien los raigaños: el rock y el pop nun son entes astractos o flotantes, sinón construcciones anglosaxones qu'absorbieron señales del folk irlandés, el country o l'heriedu africanu bultable nel blues y el góspel. Pero la denominación d'orixe paez nun esistir cuando una espresión se convierte n'hexemónica y global, y l'acentu connotáu namás se-yos apellida a “los otros”, a los que queden fuera de la semeya.
Ende asítiase la reflexón de Edi Pou, miembru del aventureru dúu “Za!” “Ye como cuando se popularizó la etiqueta de ‘músiques del mundu’, como si les músiques anglosaxones nun fueren d'esti mundu, cuando si vas hacia atrás de xuru vas llegar hasta los trovadores ingleses”, afirma. Ve ciertu escosamientu del canon pop-rock. “La cultura anglo ta nun ciclu de decadencia y la sociedá ábrese a otres influencies. Va un tiempu fueron les músiques de cultures alloñaes, y agora mírase a la tradición propia”, axunta'l músicu , quien apunta al enclín al kilómetru cero y a “la reivindicación de lo local”.
En realidá, nel títulu d'esti artículu añera una redundancia: la palabra folclor alude al calter popular, d'onde procede la forma pop. ¿Falamos de lo mesmo, entós? Sí na so naturaleza orixinaria, magar cada etiqueta desenvolvió significaos distintivos. Como apunta Edi Pou, “nel folk pesen la coleutividá y l'asociacionismu”, mientres que'l pop va acomuñáu “a la producción industrial y a la creación d'ídolos”. Nel folclor son más importantes los cantares (concebíos pa dir de boca en boca) que los artistes y les estrelles, magar ta por ver si, nesti nuevu orde en que se celebra lo más guañao, los creadores van saber arreglase por que les sos composiciones sigan vives dientro d'un sieglu, o más, de la mesma que'l catálogu que los precede.
Post-folk: la revolución de los fíos de la tradición asturiana
El sieglu XXI llegó a la música tradicional asturiana col ésitu casi planetariu del gaiteru de Villaviciosa José Ángel Hevia, que vendió más de dos millones de copies col so discu “Tierra de naide”. Hevia, un virtuosu de la gaita conocedor en fondura de la tradición, revolucionó'l xéneru non solo no musical, tamién lu dixitalizó cola gaita electrónica multitímbrica. Los músicos de la escena asturiana actual nun s'escaecieron de siguir revolucionando la tradición, y siempre dende una fonda conocencia de les esencies.
Ye'l casu de Marisa Valle Roso –qu'esti día publicó'l so nuevu discu, “Lo fugaz”– y d'Anabel Santiago, dos nueves reines de la tonada que supieron abrir nuevos caminos. Valle Roso reconfigura la tonada en delles temes del so últimu trabayu, lo mesmo que facía Santiago col LP de 2018 “Y andá”, col que “electronizó” munchos xéneros cola ayuda del músicu Fruela 757. Esllumante foi'l trabayu “Manual de cortejo” (2019), de Rodrigo Cuevas, con Raül Refree, tamién na mesma llínia de subvertir la tradición folklórica dende la conocencia fonda del cancioneru. Y non menos interesante ye'l llabor musical que tán desenvolviendo nos últimos años el dúo “L-R”, formáu por Letizia Baselgas (voz y pandereta) y el multiinstrumentista Rubén Bada. El so últimu trabayu, acabante editar, lleva por títulu “N.O.S.” Preséntense como un grupu “post-folk”, términu que bien podría espardese a tolos mentaos.
