El Muséu Evaristo Valle recuerda la figura del artista maliayés José Luis Posada con motivu del ventésimu aniversariu del so fallecimientu. L'espaciu artísticu xixonés rínde-y tributu con una esposición que puede visitase dende'l martes pasáu, y qu'inclúi cinco caricatures del mesmu Evaristo Valle, que se fixeron en 1998, pero que correspuenden con distintes etapes de la vida del pintor. 

José Luis Posada, que finó en Cuba nel añu 2002, tuvo estrechamente venceyáu al Muséu Evaristo Valle dende 1991, cuando tornara a Asturies. Artista multidisciplinar, foi reconocíu tanto en Cuba, onde s'asitió con apenes nueve años, como a nivel internacional.

Posada trabayó distintes disciplines artístiques. La caricatura foi una de les más reconocíes na so trayectoria, pero tamién efectuó creaciones en materies como'l dibuxu, la ilustración, el grabáu, la pintura, el muralismu, la cerámica, la escultura o la escenografía. Inclusive s'atrevió cola poesía, onde dexó tamién el so sellu. 

José Luis Posada asitió en Cuba en 1940, víctima del esiliu pola Guerra Civil, yá que so padre lluchara nel bandu republicanu. Al otru llau del Atlánticu fixo la so vida na localidá de San Antonio de los Baños, onde collaboró cola prensa local, diseñando ilustraciones en periódicos, pa pasar depués a la revista “El Caimán Barbudo”, siendo'l responsable del so logotipu. Completó la so vida en Cuba como director del taller gráficu de La Habana, nun país que lu distinguió col Premiu d'Honor del Festival Internacional de Avignon en 1975 y tamién el del Salón d'Artes Plástiques de la Unión d'Escritores y Artistes de Cuba, en 1985.

En 1991 tornó a Asturies, onde trabayó los sos últimos proyectos. Ente ellos les caricatures qu'agora s'esponen nel Muséu Evaristo Valle, y que recueyen distintes hestories, como si d'un cómic se tratare, que podríen venceyase a la vida del pintor que da nome a esti espaciu d'arte asitiáu en Xixón.