Miguel Asprón y Daniel García van dedicáse a la ciberseguridad. María González va facer carrera n'intelixencia artificial. Y David González va programar. Los cuatro son alumnos del grau n'Inxeniería Informática en Tecnoloxíes de la Información, na Escuela Politécnica d'Inxeniería (EPI) de Xixón. Los únicos estudios nos que puede falase de futuru ensin usar el condicional: la tasa d'insertamientu llaboral de los estudiantes ye del 90 por cientu. Tan alta, qu'ún de los factores del tamién bultable índiz d'abandonu –de media, casi'l 50 per cientu– ye que los estudiantes “aparquen” los estudios porque atopen trabayu primero de terminar la carrera. 

¿Imposible? “Non, pasa dacuando. Porque nesta Universidá tenemos muncho contactu coles empreses, yá dende segundu cursu aprosimao”, esplica Miguel Asprón. Y añade Daniel García: “Hai rapazos qu'atopen un trabayu a media xornada nuna empresa, y qu'igual yá queden ellí. Nun quier dicir que yá dexaren los estudios, sinón que los aplacen pa un momentu nel que puedan compaxinalo coles sos carreres llaborales”. Matiza: “Nun fai falta tar cuatro años aprendiendo de too si yá yes bonu en dalguna rama na que te tas especializando yá nel mercáu llaboral. Hai empreses que te fichen primero de terminar”. Los dos estudiantes acaben d'empezar terceru.

Falen, amás d'ellos, les cifres. Según l'últimu Informe de Siguimientu del Títulu, publicáu pola Universidá d'Uviéu, más de la metá d'alumnos que se matricularon nel cursu 2015-2016 abandonaron enantes de rematar. Una tasa llixeramente superior a la d'otres inxenieríes, pero con una peculiaridá: cerca del 20 por cientu faenlo colos estudios yá avanzaos, en cursando yá la metá de la titulación o con solo un cursu por rematar. 

“Los alumnos de cursos avanzaos quiciabes sí abandonen porque atopen un empléu, pero la verdá ye qu'en segundu nótase un ‘baxón’ al respective de primero”, afirma María González, qu'acaba d'estrenar el so segundu cursu na titulación. Un “baxón” tan grande como del 35 por cientu ente les matrícules de 2018-2019. 

A María González nun-y choca la cifra: “Nótase yá nes clases. Somos bastantes menos”. Los estudiantes tamién atopen una esplicación a esi abandonu que, según los datos oficiales, tamién se da n'otres inxenieríes –anque en tasa menor, supera'l venti per cientu–. “Ye porque, cuando llegues en primeru, el choque ye brutal”, apunten Daniel García y Miguel Asprón. El primer cursu ye común pa toles inxenieríes: “A ver, que llegues a Inxeniería Mecánica y sabes yá lo qu'hai, pero n'informática nun lo esperes. O nun lo espera tol mundu”. “Hai muncha xente que vien a informática y nun sabe a lo que vien, o tien una idea preconcebida que nun s'afaya a la realidá”, apunta David González, tamién en tercer cursu.

Primero ye fundamentalmente teóricu y con asignatures trabayoses, como Ondes y electromagnetismu o Álxebra llineal. Axunten que, a pesar de que van tener qu'usales poco, “creemos que sí son una bona base pa tolo qu'aprendemos depués”. Entienden que dalgunos dexen los trastes: “El primer añu, nesti grau, vas tocar pocos ordenadores. Tu díces-y a un rapaz que quier programar videoxuegos que se siente a estudiar álxebra... Y bono, pasa esto”, apunta Daniel García. Y fae: “Ye un grau complicáu, eso ye verdá. Si tienes bien claro a lo que te quies dedicar nel mundu de la informática y les tos previsiones encaxen col ámbitu de la Formación Profesional, yo creo que nun ye mala idea empezar por un grau de FP”. 

Ye lo que ta faciendo Eloy Vide, alumnu de Formación Profesional. Tien 17 años y el futuru yá casi claro. “Esti día montamos un ordenador en clase dende cero y gustóme. Nun refugo empobinar el mio futuru llaboral escontra esta rama”, apunta. Y señala, xunto a los estudiantes del grau na EPI de Xixón, que la FP comparte delles problemátiques cola enseñanza universitaria n'Informática: “Tamién hai abandonu, pero nesti casu non porque s'atope empléu primero de terminar. Más bien polo qu'asocede equí nel primer añu, pol choque de lo qu'esperes y de lo que depués atopes”. Si anecies, apunta Vide, paga la pena: “Yo toi motiváu y yá toi pensando en facer otru ciclu de grau superior. Lo de la universidá toi pensándolo tamién, pero sería más al llargu plazu”. 

Conciden los alumnos d'Inxeniería Informática en que lo importante ye centrase nos estudios en primeru, anque sía más teóricu, porque l'itinerariu ameyora col pasu de los años: “Cuando llegues a terceru yá lo ves tou d'otra forma”, apunten los estudiantes más veteranos. Y los qu'aguanten, ganen. La “tasa d'eficiencia”, l'índiz que compara los creitos totales nos que se matriculen los estudiantes colos que superen, ye desaxeradamente alta nel cuartu cursu: más del ochenta por cientu nes últimes cinco promociones. Tocantes a los motivos pa matriculase: ¿Pola salida llaboral o pola vocación? “Vocación, eso siempre”, respuenden, unánimes, los estudiantes.