Les hamburgueses más solidaries véndense n'Uviéu: "Muncha xente vien a costa fecha pa collaborar nuna bona causa"

Raquel Rodríguez tien 44 años y padez paralís cerebral. “¿Y qué?”, pregúntase. “Puedo facer de too, d'un xeitu un poquiñín más lentu que'l restu, pero soi una persona normal”. Esti día, esta uvieina quixo pega-y un bon taragañu a los estigmes xunto a los sos compañeros de l'asociación d'Ayuda a la Investigación del Dañu y Enfermedaes Cerebrales (Aindace). Axuntaron nun restaurante de La Corredoria pa tastiar l'hamburguesa solidaria qu'a lo llargo d'un mes va destinar un euru de cada venta a la organización. Esti proyectu repitese cada 30 díes, con una asociación distinta, y cualesquier puede collaborar solicitando esti “productu mensual”. Anque la verdadera intención de los integrantes, más allá de la recaudación monetaria, ye dase a conocer, pa demostrar que los problemes neuronales nun dixebren al que los padez de la sociedá. “Tamos equí pa dicir que ‘non’, que la nuesa realidá ye otra”, esplicaron dellos socios. 

Aindace realiza dende 2015 proyectos y actividaes con persones que, por dellos motivos, desarrollaron mancadures neurolóxiques. “Entueyos na xestación o'l partu con secueles de paralís cerebral, enfermedaes neurodexeneratives, accidentes cerebrovasculares, traumatismos craneoencefálicos...”, enuncia'l director de la entidá, Juan Álvarez. Lo importante ye que los integrantes y les sos families se sientan atotaos y, lo más importante, con capacidaes. 

Juan Arredondo participa nos talleres cognitivos, que la pedagoga Mara Méndez imparte tolos miércoles y ta pletóricu al comprobar que solo tien coses que sumar a la sociedá: “Puede que tenga un problema, pero eso ayúdame a encarar la vida otra manera, a ser bona persona y saber como actuar col restu”. A los sos 39 años yá tien claro qu'anque-y va “a costar más”, tien mil motivos pa siguir alantre y formase como lo fadría cualesquier otru. 

Lo mesmo-y pasa a Estefanía García, que lleva namás seis meses na fundación, pero disfrutó de toos y caún de los sos programes: dende allegar al hospital amarutaos pa visitar a neños pequeños hasta les visites al zoo y el Muséu de Belles Artes. “Asumí que tengo un 65% d'incapacidá, pero eso nun ye motivu pa que la xente se ría de nós. Munchos nun nos entienden, pero nun nos vamos rindir nunca. Vamos siguir lluchando”, asegura. 

Lucía Menéndez desfaese n'agradecimientos al tener una “hamburguesa nel so honor”. Y eso que ye vexetariana. Pero delantre d'homenaxe talu nun puede facer otra cosa qu'una esceición na so dieta, según asegura. 

Diego Alonso ye ún de los trés xerentes d'esti “fast food” asitiáu nel Conceyín. Esta ye la so octava comida solidaria, un proyectu qu'inauguraron xunto al local por cuenta de qu'un familiar cercanu padecía un defectu mental y ente los socios quixeron dar visibilidá y oportunidaes a distintes fundaciones implicaes con delles causes sociales. “Ta funcionando perbién, cada vez más xente vien a costa fecha a por esta propuesta del mes, cola que sabe que va collaborar nuna bona causa”, declara Alonso. 

Ángela Antúnez ye la xestora de proyectos sociales de la organización y camina con emoción d'un llau pal otru de la terraza del establecimientu arguyosa de lo que consiguieron y cola mirada puesta no que queda por percorrer: “Entá somos un proyectu pequeñu, ensin munches ayudes, pero facemos tolo que podemos”. 

Lleguen les bandexes apinaes d'alimentos, pa dar el pistoletazu de salida a estes xornaes de sensibilización. Pan brioche, carne de vaca, quesu Taleggio, mermelada de beicon y... Un extra de visibilidá.