Una carrera al algame de la mano. Asina ye'l grau n'Inxeniería Xeomática –antigua Topografía– que s'imparte na Escuela Politécnica de Mieres (EPM) y que la so continuidá abulta que ta en riesgu. ¿Por qué s'alcuentra en cualquier llau? Porque cuando daquién consulta una dirección nel navegador del móvil atopa col trabayu del inxenieru xeomáticu. Pero esta carrera toma muncho más. Tantu, que n'Asturies cuenta con plenu empléu, daqué de lo que non toles titulaciones universitaries pueden presumir. 

“Quiciabes el so problema ye d'identidá, ta nun llimbu nel que les persones nun saben qué significa o les sos posibilidaes, pero igual si falamos d'Inxeniería de Datos Xeoespaciales pue ser más representativo”, esplica Carlos López, profesor de la EPM, quien destaca la tresversalidá de la carrera. Por casu, nel ámbitu forestal, que tamién s'estudia en Mieres, onde “tolos aspeutos rellacionaos cola monitorización de los recursos naturales van de la mano de la xeomática”. P'atopar una esplicación de too lo qu'engloba esta disciplina, la profesora Cristina Allende da cuenta de que “si combinamos la Inxeniería de Datos, la Xeografía y Ordenación del Territoriu, la Inxeniería Informática en Tecnoloxíes de la Información y la xeolocalización de los datos, tenemos la Inxeniería Xeomática, la inxeniería de les inxenieríes, como la definió l'exministru de Ciencia y astronauta Pedro Duque”. 

Volviendo a aspeutos más concretos, la docente Charo González repara en conceutos como los coches autónomos, esos a los que nun-yos fai falta conductor. “Estos vehículos riquen una información xeorreferenciada pa poder movese, y eso dalo la Xeomática”, apunta. Y un casu más cercanu, el volcán de La Palma y toles vegaes que se falaba de les imaxes qu'ufiertaba'l satélite Copérnico. “Eses imaxes tuvieron que ser trataes, daquién les xeorreferenció y combinó les bandes, eso faenlo los inxenieros xeomáticos”, sorraya la profesora.

Pablo Álvarez, con ún de los drones.

Otru defensor de la carrera ye José Suárez, presidente de la delegación territorial n'Asturies y Cantabria del Colexu Oficial de Topógrafos. “Nesti ámbitu soi tercer xeneración, la mio familia cumple 100 años de dedicación nesti área y considero que la Xeomática ye ablucante”, esplica, señalando que “ye un términu paragües qu'alluga la topografía, la cartografía, la xeodesia, la fotogametría, la teledetección y los sistemes d'información xeográfica”. 

¿Y los alumnos? Los estudiantes destaquen, sobremanera, l'usu de la tecnoloxía más piquera dientro de la carrera, una de les sos principales pilastres, ente otres virtúes. Roberto Fernández asegura que, dende pequeñu, “siempre me llamaron los mapes, asina que yera una carrera ideal pa mi, pero matriculame supunxo tou un descubrimientu, como l'usu de los drones”. Nel casu d'Ana Aguilera, la so pasión siempre fuera l'espaciu y esti ye un campu que tamién toma la xeomática. “La carrera tien munchos componentes espaciales y de fechu la mio intención ye dedicame a daqué rellacionao con ello, como facer cartografía de la lluna o de cualesquier otru planeta”, apunta. Pablo Álvarez, pela so parte, afayó que Xeomática bebía de munches fontes. “Matemátiques, física, xeografía, programación, informática... hasta modeláu en 3D en cuenta del so usu en videoxuegos, la carrera toma tantos ámbitos que va ser bien cenciello afayase a un puestu de trabayu”, esplica. Ellos yá tán convencíos, pero inda queda per delantre una importante llabor d'espardimientu.