Mediu sieglu dempués de la traxedia en La Fabricona

Pasó mediu sieglu. Pa ser más concretos, el pasáu 6 de febreru cumpliéronse 51 años dende aquel aciar día nel qu'una esplosión na acería LD–I de l'antigua Ensidesa fixo espavoriar a Avilés. Una caldera de vapor y agua sobrecalentada saltó pel aire. Finaron diez persones y aprosimao un centenar resultaron mancaes de diversa considerancia. Anguaño yá nun queda nada, menos l'alcordanza. L'acería nun esiste y les bateríes de coque apegaes van sumir pa facer sitiu a modernes empreses medioambientalmente sostenibles y cola innovación por bandera.

El mayor impactu, tanto físicu como psicolóxicu, fuera de les instalaciones siderúrxiques sufriéronlu los vecinos de Llaranes, hasta onde volaron restos d'aceru ya inclusive pieces de gran tonelaxe aventaes pola detonación, que llegó a sentise na capital del Principáu. Les imaxes fueron dantesques ya inda güei caltiénense na mente de los que vivieron aquelles xornaes de dolor, caos y llerza. 

La planta siderúrxica avilesina taba considerada daquella como una de les más segures d'Europa. Ello ye que nes hemeroteques tán les declaraciones de responsables del antiguu Institutu Nacional d'Industria (INI) faciendo gala d'ello. A partir d'aquel momentu la seguridá convirtióse nuna obsesión de los responsables de la siderúrxica. Una obsesión que se caltuvo col pasu del tiempu magar los cambios na propiedá de la compañía. 

A lo llargo d'esti mediu sieglu, solo una vegada se volvió a esparder la medrana pela ciudá. Foi n'ochobre de 2018, cuando una colosal quema nes bateríes de coque, anubrió de fumu negro la ciudá al amburar la cinta qu'alimentaba la torre 1 de la destilería de carbón. El fueu consumió la estructura d'uralita que la protexía faciendo que cayera embaxo y na so cayida, partiera en dos la tubería de gas. Nesta ocasión foi namás el sustu y permunchos daños materiales, nuna instalación que yá tenía fecha pa la so clausura y desapaición. 

La situación ye bien distinta mediu sieglu depués d'aquella traxedia qu'afaró Avilés, Asturies y que conmocionó a tol país. La medrana sumió pa dar pasu a la esperanza y tamién a la incertidumbre sobre'l futuru de los terrenes que dende mediaos del sieglu pasáu acoyeron les instalaciones de La Fabricona y atraxeron a la ciudá a cientos de miles de persones. 

Yá s'activaron los trabayos pa valtar les bateríes de coque y lliberar los terrenes pa la so posterior urbanización con fines industriales y empresariales. Entá ye una incógnita'l futuru de les instalaciones qu'acoyíen los almacenes xenerales y ún de los gasómetros, que tanto'l Conceyu como la Cámara de Comerciu quieren indultar. La idea ye crear un espaciu multifuncional que pueda allugar proyectos d'I+D y que puedan utilizar les empreses de la redolada, amás d'un centru de divulgación científico-tecnolóxica. 

Nada que ver cola hestoria, el paisaxe y el paisanaxe de fai “solo” 51 años.