Windar amplía la so espansión internacional al construyir una nueva planta en Polonia

Windar Renovables, del grupu Daniel Alonso, va invertir 80 millones d'euros na construcción d'una nueva fábrica, nesta ocasión en Polonia. El proyectu va suponer la fabricación de 100 torres eóliques marines al añu. La firma avilesina anunció esta nueva inversión mientres desenvuelve nes sos instalaciones d'Avilés la producción de 62 pieces de transición (xuncen la torre d'una turbina eólica marina cola so cimentación) pal parque offshore de Vineyard Wind 1 n'Estaos Xuníos. 

El presidente y CEO de la compañía, Orlando Alonso, yá anunciara'l branu pasáu que la compañía tenía sobre la mesa planes d'espansión, y que s'estudiaba la posibilidá d'abrir dos nueves plantes de fabricación n'Europa. Naquel momentu nun podíen concretase los nuevos allugamientos. Pero Polonia siempre tuvo na mente de los executivos de Windar Renovables, pola so proximidá a la zona del Bálticu y del Mar del Norte. Un aspeutu qu'influyó permuncho na decisión final teniendo en cuenta los nuevos contratos que consiguió la firma avilesina y que Polonia s'axunto al desarrollu de la enerxía eólica marina. 

Windar Renovables informó na so páxina web que cuenta entamar la construcción d'esta nueva fábrica a lo llargo de 2022. Con una superficie de cerca de 120.000 metros cuadraos, la instalación va incluyir árees cubiertes pa trabayos de soldadura, y otres pa tratamientu superficial y ensambláu, mesmo qu'una zona d'almacenaxe. Calcúlase que cuando la fábrica tea a plenu rendimientu va tener una plantiya d'unos 450 trabayos directos. 

La planta va tener capacidá pa fabricar añalmente 100 torres, destinaes a los aeroxeneradores marinos de nueva xeneración. Va permitir fabricar de manera seriada secciones d'hasta 450 tonelaes, de 10 metros de diámetru y 50 metros de llargor. 

Les proyecciones de la compañía apunten a que la producción empiece a principios de 2024, p'abastecer a Polonia como oxetivu principal, "mesmo qu'a otros países de la zona del Bálticu y del Mar del Norte, onde la demanda va crecer nos próximos años", esplicó la empresa avilesina. Polonia ye un mercáu emerxente n'eólica marina, onde apocayá se puyaron los primeros 5,9 gigavatios (GW), que los sos axudicatarios fueron dalgunos de los mayores promotores del sector. Ta previsto que los primeros parques qu'entren a xenerar enerxía llimpio lo faigan a partir de 2025. Les puyes pa la segunda fase de proyectos, que se calculen alrodiu de 5 GW, tán planiaes pa celebrase ente los años 2025 y 2027. 

Según la compañía, con esta inversión Windar Renovables refuerza la so posición como líder mundial n'enerxíes llimpies y sostenibles al traviés de la fabricación de torres y subestructures pa la industria eólico marina. 

La nueva factoría va permitir aumentar la capacidá global de fabricación y va axuntase a los centros yá esistentes n'India (2011), Brasil (2013), México (2016), Rusia (2018), como tamién a los seis complexos que la empresa tien n'España, desque se fundó en 2007 n'Avilés. 

Windar Renovables xunto col so sociu estratéxicu Navantia, tamién participa activamente nel mercáu de la construcción de subestructuras pa eólica marina (jackets, monopilotes y estructures flotantes). Dambes desenvolvieron siete proyectos nos postreros 7 años, y tán anguaño participando en delles llicitaciones.  

Amás, el contratu pa Vineyard Wind 1 n'Estaos Xuníos supon garantizar más de 400 empleos na so planta asturiana hasta 2023. Y apocayá conocióse que va tener una cuota de protagonismu nel próximu finxu de la eólica española: construyir una partida de 14 plataformes eóliques terrestres 5.X que tienen la particularidá de ser les más potentes del mundu, visto que caúna d'elles puede producir seis megavatios d'enerxía eléctrica al añu. 

Windar Renovables propúnxose, amás, cotizar nel mercáu continuu, anque los sos planes tán pel momento en “stand by” por cuenta de la falta de seguridá na que se mueven los mercaos bursátiles. La firma avilesina, ún de los líderes mundiales nel so sector, caltien pel momento la so intención de salir a Bolsa nel primer semestre d'esti añu, anque en viendo como evolucionen los mercaos y que se caltengan los proyectos qu'a nivel mundial se tán axudicando, y los que se tán xestando.