El llobu cerval cangués “Trasgu” ta a piques de cumplir 10 meses y evoluciona favorablemente nel so desarrollu. Nació'l 3 de mayu del añu pasáu frutu de la relación entre “Zar” y “Sasha”, los dos llobos cervales europeos que l'amante de los animales Luis Freijanes traxo d'Alemaña nos últimos años y que curia nes sos instalaciones de la localidá de Veigaipope, en Cangas. Los trés animales caltiénense xuntos nel recintu preparáu pa ellos por Freijanes y conviven como la familia que son, lo que permitió al so cuidador dir observando los sos distintos comportamientos. 

“Al caltener a la familia xunida vemos que'l cachorru ta más consentíu y qu'eso fai que sía más agresivu que los sos padres”, esplica Freijanes, que va apuntando nun cuadernu tolos cambeos físicos y de comportamientu qu'observa nos sos felinos y más entá dende la llegada del cachorru a la familia.

Ente dalgunos de los datos recoyíos tien apuntáu'l momentu de la nacencia de los caniles, a los 12 díes de vida. Son bien importantes pa los exemplares d'esta especie porque yá empiecen a comer a los dos meses de vida anque sigan mamando hasta los cuatro. 

Tamién reparó en que desarrollen rápido les oreyes y a los 7 díes apaez lo que se conoz como pinceles, la punta negra de la oreya tan característica de la especie. “El motivu ye que'l sentíu del oyíu ye mui necesariu pa ellos dende pequeños”, esplica'l so cuidador. 

Magar que'l cachorru yá ye casi tan grande como so madre y pesa sobre los catorce kilos, Freijanes observa qu'entá depende d'ella enforma. “Inda veo qu'hai munchos afalagos entre ellos, inclusive col padre”, señala. 

L'únicu momentu que puede xenerase daqué conflictu ye'l de la hora de comer, anque diz que se respeten ente ellos y que'l primeru que se fai cola presa ye'l que queda con ella. 

La forma de rellacionase de Luis Freijanes colos sos animales ye al traviés del xuegu, pues ye la única manera que tien d'entrar nel so recintu y averase a ellos, anque recalca por que quede claro que nin los afalaga nin son animales adomaos. “Xugar espabílalos mental y físicamente, porque los faigo correr pa cazar un bichu, ehí veo que tolos sos sentíos funcionen”, esplica.

"Trasgu".

Xunto a “Trasgu” nacieren otros dos cachorros que nun llograron sobrevivir. Freijanes tuvo qu'estremalos de la so madre a les poques hores de nacer, cuidao que'l machu intentó atacalos, y anque probó a reintroducilos una vegada solucionada la crisis, “Sasha” refugólos y tuvo que facese cargu d'ellos ensin que'l resultáu fuera esitosu por desgracia y el cuidados llaméntalo enforma cuando recuerda lo asocedío. 

“Diome muncha pena perder a los hermanos, garrélos a les dos o trés hores de nacer y nun tomaren el culiestru, polo que nun teníen inmunidá y yera difícil que sobrevivieren”, reconoz inda amurniáu mientres remembra aquellos primeros díes de vida de los cachorros tres l'allumamientu.

Agora mesmo “Sasha” vuelve tar en tiempu de celu, pero Freijanes tienla dixebrada del machu por que nun quede de nuevu embarazada. La razón, esplica, ye que nun dispon de medios pa poder criar a más cachorros nin espaciu abondo pa ello nes instalaciones coles que tien anguaño. 

Sicasí, esplica que sigui teniendo en mente un proyectu que nun ta dispuestu a dexar atrás y pol que sigue apostando. Asina diz que nun arrenunció al so oxetivu de crear un centru d'investigación sobre'l llobu cerval y de recuperación de fauna, onde poder siguir criando nuevos cachorros d'esta mesma especie cola que ta familiarizáu. 

Trátase d'una idea, un proyectu pol que, esplica, lleva lluchando munchos años, más d'una década, calcula. Sicasí, señala que na actualidá sí qu'arrenunció a la posibilidá de desenvolver esta iniciativa en Cangas. Comenta que ta presentando la so propuesta n'otros conceyos cercanos pa ver d'alcontrar sofitu a lo que tien en mente, yá que enagora nun lu atopó nel conceyu onde tien les sos instalaciones de Veigaipope. 

Busca respaldu n'otres zones “pa que m'ayuden a crear esi centru, porque en Cangas veo que ta enllancáu y nun lo voi consiguir”, afirma. 

Amuesa'l so malestar con esta situación, pues entiende que contar con esti tipu d'exemplares nun ye daqué habitual. Considera que la so propuesta y tener trés llobos cervales “ye un gran reclamu”. 

Incide en que teniendo estos exemplares ya impulsando un centru d'investigación sobre'l llobu cerval y de recuperación de fauna, na comarca podría instalase'l que sería'l primer equipamientu d'investigación de la especie n'España, que “atraería visitantes a la zona y sirviría pa dar a conocer a un animal que fai 130 años vivía nos nuesos montes”.