Pelayo va volver a batallar en Cuadonga. L'Asociación de Recreación Histórico Cultural d'Asturies (ARHCA) propúnxose reproducir, cola mayor fidelidá posible, el míticu trunfu sobre los invasores musulmanes que traxo l'entamu de la Reconquista. El proyectu foi presentáu a la comisión de la que va salir el programa de conmemoraciones y actos que promueve el Gobiernu del Principáu con motivu del 1.300.º aniversariu d'un acontecimientu qu'adquirió tintes míticos. 

De confirmase, la representación yá tien fecha y allugamientu amañosu. Sería'l 28 de mayu, que ye'l día nel que l'historiador Sánchez Albornoz data la batalla, y el llugar, una escampada próxima a la cueva. L'actuación acabaría con una ufrienda a la Santina, con representantes institucionales. 

Según los sos promotores, la recreación de la batalla de Cuadonga daría pie a la grabación d'un documental y a la preparación de menús y eventos gastronómicos qu'animaríen la hostelería. Alrodiu d'ella desenvolveríense otres actividaes, quiciabes un coloquiu n'homenaxe a Pelayo. 

Francisco Díaz de Otazu, profesor d'Historia del Institutu Aramo d'Uviéu, miembru de l'Asociación de Reservistes y d'ARHCA, esplica que col proyectu, que'l so borrador yá foi presentáu y ta abiertu a cambeos, pretende reforzase la programación d'esti añu del aniversariu, pero, amás, podría tener continuidá nel tiempu y repitise cada añu o cada dos años. “Ensin enfotu belicista, sinón hestóricu y cola máxima fidelidá”, puntualiza Díaz de Otazu. La ropa, les armes, diseñaríense espresamente pa la ocasión, asonsañando los utilizaos nel sieglu VIII polos dos exércitos en lid. 

Adolfo Mariño, abá de Cuadonga y ún de los integrantes de la comisión organizadora de los actos que convoca la Conseyería de Cultura, presume que la efeméride va atraer a muncha xente a Cuadonga. Adolfo Mariño fala de “un enantes y un depués de la pandemia en Cuadonga”, con una bultable medría de visitantes. “Ta viniendo xente tolos díes: muncha aporta ofrecida pol coronavirus, por enfermedaes, como agradecimientu, y depués ta la naturaleza de la zona, que ye un atractivu únicu”. 

La recreación histórica de la batalla de Cuadonga nun va ser, nin tanto, l'únicu eventu entamáu por cuenta de la conmemoración. El pasáu vienres, ensin dir más allá, nel Muséu Arqueolóxicu d'Asturies, n'Uviéu, les autoridaes anunciaron una esposición dedicada a la batalla de Cuadonga, allá pel mes de setiembre, con oxetos, ropes y armes del sieglu VIII. 

Va haber otra esposición, bibliográfica y documental, na Biblioteca d'Asturies, tamién na capital asturiana, y el Muséu de Belles Artes d'Asturies prepara otra, sobre l'arte y Cuadonga. Va haber otra más, de pintura, na sala de la Fundación Sabadell Herrero. 

La iniciativa más ambiciosa y la de mayor proyección nel tiempu y p'hacia l'esterior va ser, ensin duda, la ruta o'l Camín de los Santuarios, que va xunir San Salvador n'Uviéu col Santuariu de Cuadonga y el Monasteriu de Santu Toribiu de Llébana, na vecina Cantabria. 

A lo llargo del añu va haber conferencies, pa les que se riquió la collaboración del RIDEA (Real Institutu d'Estudios Asturianos) y pa les que se va contar con espertos de la máxima solvencia. Dalguna cuandu menos va ser en Cuadonga. Va haber tamién un conciertu de la OSPA (la Orquesta Sinfónica del Principáu), otru del coru “El León de Oro” y fálase d'un recital o dalguna collaboración del tenor de Cangas del Narcea Joaquín Pixán. Anúnciense publicaciones, publicidá en mupis y hasta aplicaciones informátiques alredor del aniversariu. 

José Manuel González Castro, alcalde de Cangues d'Onís, tamién va llevar les sos propuestes a la comisión, que la so segunda xunta espérase d'equí a pocos díes. Pel momento, el Conceyu decidió recuperar la representación de la proclamación de Pelayo como líder de los astures –titulada “Astures, Pelayo el nuesu rei”– na redoma de la ponte “romana”, y que, depués de trés años repitiéndose quedó atayada pola pandemia.