–Ucrania. Me preocupa Ucrania.

Esta demostración de congoxa podría ser real y tar pronunciada ayeri, pero'l que fala ye un personaxe del universu futurista de “Dona y Deva”, la novela d'anticipación que Pedro de Silva, expresidente del Principáu, publicó en 1995 cola trama antemanada al añu 2035. El contestu ye un mundu ficticiu, un futuru aturbolináu y una Europa confederal que vive somorguiada nun fuerte discutiniu a cuenta de la reimplantación de la pena de muerte nel Vieyu Continente. El País Vascu ye una república independiente y esmolez Ucrania. 

L'antigua república soviética entra nel relatu inxertada nuna conversación nun paséu peles cais de Praga. Ho Maeda, un chinu nacíu en San Francisco, pon al día a Dona, una de les protagonistes, verbalizando una amenaza global que na rellectura del presente impacta. Ucrania ye la “obsesión” de Rusia, afirma. “Si Ucrania se entrega otra vez a Rusia, será el principio del fin. En ese momento, solo quedará la duda de si su expansión empezará por el Este o por el Oeste, pero irá una detrás de otra. En Ucrania, a medio plazo, nos jugamos la existencia”. 

Asina s'antemanen ehí, d'un xeitu daqué sutil, a la manera na que fai les coses la ficción, les tensiones que, n'efectu, acaben d'españar nos bombardeos rusos d'esti febreru de 2022, con trece años d'adelantu sobre la previsión futurista de De Silva. Tal que la recuerda'l so autor, “Dona y Deva” ye una novela “de munches hestories cruciaes” na que “fui un pasu más allá nel futurismu”. Nel so futuru distópicu, Rusia volvió llamase Imperiu Rusu y Ucrania ye “la pieza que le falta para recomponer” de verdad “el antiguo imperio”, “un Estado asociado comercial y militarmente a Europa”, porque “solo así puede mantener su independencia”. Tamién esto, por si hai duldes, dizlo Ho Maeda nel testu de 1995. 

“Ye difícil reproducir cómo funcionen les mios cavilgadures”, confiesa l'autor. Nun recuerda esactamente cómo llegó hasta Ucrania, pero sigo reconoz nel so testu un anclaxe evidente cola xeopolítica del momentu nel que s'escribió la novela. Pasaren cuatro años dende la independencia y a los güeyos del observador sollerte yá s'antemanaba'l so potencial como actor principal nel tableru políticu internacional. “Nun hai nada gratuitu” cuando s'escribe del futuru, afirma De Silva depués de relleer, él tamién, les zones de “Dona y Deva” que transiten peoles inestabilidaes ucranianes. L'antigua república soviética taba en 1995 casi acabante d'independizar y “supongo”, conxetura, “que l'asuntu taría lo bastante indefiníu como pa que yo pudiera especular”. Dexó escrita la profecía, volvió al presente y munchos años depués, cuando en 2014 les revueltes del “Euromaidan” desaguaron nel derrocamientu del presidente prorrusu Viktor Yanukóvich y Rusia anexionó Crimea y reivindicó el Donbás “dixi: ‘Ehí ta Ucrania’”. 

Ende siguió tando, y a Pedro de Silva tamién-y sonó conocíu ún de los últimos discursos de Vladimir Putin enantes del ataque, coles sos referencies a la “artificiosidá” de la independencia ucraniana, les sos velaes apelaciones a la reconstrucción del imperiu y el so intentu de demostrar qu'Ucrania “en realidá sigue formando parte de la madre patria”. 

Xugando cola hestoria, cola mitoloxía rusa sobre'l vecín del Suroeste y con otres blimes, el novelista ató cabos y foi texendo una historia que'l tiempu demostró pasmosamente admonitoria. Lo dicho, que nun hai nada gratuito. 

–Si (Ucrania) es tan importante, ¿por qué razón todavía no se la ha merendado?

Pedro de Silva. | Juan Plaza

Volvimos a 2035 en Praga. Al embocar la Ponte Carlos, Ho Maeda respuende al interés de Dona que “son la tercera potencia nuclear del mundo. Hace más de cuarenta años, cuando se desmembró la antigua URSS, se quedaron con los arsenales secretos, con toda la tecnología y los equipos para seguir produciendo armamento y con una parte importante de la flota del mar Negro”. Ucrania ye “la reina del tablero”, diz, pero “si cae, en mi opinión, Rusia se movería primero hacia Europa. (…) Si Europa está fuerte y se mantiene firme, viviremos tranquilos”, enllaza l'analista de ficción n'otru camientu que de secute la historia, y toles miraes que conflúin na UE, convirtieron en reveladora. Pue qu'Ucrania escareza de poder nuclear –arrenunció al so arsenal en cuenta de recibir de Rusia una garantía de seguridá que güei resulta interesada–, pero sí dispon de “infraestructures o tecnoloxíes d'aquella dómina”, alvierte De Silva de regresu al presente. 

Si vuelve un ratu a “Dona y Deva”, l'expresidente del Principáu va recordar los otros pronósticos cumplíos d'aquel viaxe que fixo al futuru. En 1995, internet nun esistía, pero los sos protagonistes comuníquense pela rede. Nun había noticies del grafenu, pero les pantalles de los ordenadores son na novela flexibles y enrollables… “Cuando se fai futurismu”, conclúi De Silva, “dacuando aciértase”.