Los ensayos pa comprobar cómo reaccionaría la ilesia de Santullano a un hipotéticu llucíu van executase esti mesmu añu, si ye posible pel branu. Esa ye la previsión de la Conseyería de Cultura, Política Llingüística y Turismu y l'Arzobispáu d'Uviéu, que sicasí nun dan plazos definitivos de la intervención al depender d'un procesu alministrativu y una llicitación que puede dilatase por delles circunstancies. Estos ensayos centraron bona parte de la xunta qu'esti día caltuvieron na sede de la conseyería'l Director Xeneral de Cultura y Patrimoniu, Pablo León Gasalla, y la responsable de Bienes Culturales de la Diócesis, Otilia Requejo. Un alcuentru que marca amás l'entamu d'unes xuntes regulares de calter técnicu que van caltener dambes entidaes pa monitorizar los proyectos que tienen de mancomún. 

Según fontes de la conseyería, nel alcuentru aldericóse sobre'l proyectu de los ensayos de llucíu, que ta anguaño en redacción pero que básicamente pasará por cargar dellos tramos de los murios esteriores pa comprobar cómo afecta la operación al interior, y hasta qué puntu puede esa midida ser efectiva pa frenar los mugores que ponen en peligru les pervalibles pintures murales del templu. Los frescos, ello ye que tán pendientes d'una restauración que l'Institutu de Patrimoniu Cultural d'España (IPCE) supedita precisamente a que se protexan los murios esteriores del templu. 

Una vegada que'l proyectu tea llistu, tendrá de ser aprobáu pol Plenu del Conseyu de Patrimoniu Cultural d'Asturies, y darréu salir a llicitación. El deséu de la conseyería y del Arzobispáu ye que tol procedimientu pueda completase pa entamar los ensayos pel branu, la estación más aparente pa executar el llucíu. 

Amás d'esti proyectu, Pablo León Gasalla y Otilia Requejo falaron d'otres actuaciones previstes en dellos edificios, ente elles reteyar San Salvador de Valdediós ya intervenciones nes cubiertes de Santa María de Bendones y de Santa María de Soutu Lluiña.