El 39% de los pelegrinos que pasen per Asturies, prácticamente cuatro de cada diez, viaxen solos, mentanto qu'un 31% faenlo con amigos, un 22% en pareya, un 7% con familia y solo un 1% nun grupu organizáu. Asina lo conseña l'informe "La demanda turística del Camín de Santiago n'Asturies", redactáu por Eduardo del Valle, del departamentu d'Alministración d'Empreses de la Universidá d'Uviéu, pa la cátedra "Uviéu Orixe del Camín".

L'informe, qu'analiza 406 entrevistes a pelegrinos que travesaron la rexón ente 2015 y 2019, precisa qu'un 43,9% de los pelegrinos traviesen Asturies procedentes d'otres comunidaes autónomes y realizando yá'l Camín, ente que'l 56,1% aporten en distintos medios de tresporte col enfotu d'empezar na rexón l'itinerariu xacobéu. Nesti puntu, cobra especial relevancia'l papel d'Uviéu, como Orixe del Camín y puntu d'entamu de la vía primitiva, por culpa de que, según precisa l'estudiu, el volume global de pelegrinos llegaos a Santiago y con salida n'Uviéu nun dexó de crecer a lo llargo del llustru anterior al entamu de la pandemia. En 2019, sin dir más allá, la Oficina del Pelegrín de Santiago de Compostela cifra en 9.531 el númberu total de xacobeos llegaos a Santiago y que'l so puntu de partida asitiaba n'Uviéu. Esto espéyase tamién nel volume de pelegrinos que circulen pel Camín Primitivu, que pasó de rexistrar 11.473 en 2015 a 15.715 en 2019. Nesi mesmu períodu, el Camín del Norte pasó de 15.828 a 19.019.

En tou esi períodu, un 44% del turismu xacobéu procedía del estranxeru, especialmente de Francia (un 21,3% del total de pelegrinos estranxeros), Italia (20,5%), Alemaña (17,1%) y Norteamérica (10,7%). Ente los nacionales, destaca'l volume de pelegrinos procedentes de Madrid (el 12,1% del total), Cataluña (8,6%) y Castiella y Lleón (6,9%).

A la de entamar el viaxe, los pelegrinos refugen les axencies: un 95,2% organizáronse ellos mesmos el viaxe. Amás, el 62,3% nun cuenta con reserva previa d'agospiamientu, y ente los qu'antemanen reserva hasta un 24,5% fixéronlo ente ún y trés díes enantes de llegar. De media, un pelegrín fai seis nueches na rexón y gasta, en total, 306,8 euros. Curiosamente, nel gastu mediu diariu l'agospiamientu apenes supon un terciu del total de lo que gasta: el restu marcha n'alimentación y compres varies. Los pelegrinos, eso sí, valoren de forma bien positiva la hostelería (percima de 8 sobre 10 en cualquier modalidá de restauración), la gastronomía (8,60) y, especialmente, el tratu de la xente (8,87) al so pasu per Asturies. Sicasí, les carreteres y la señalización llogren peor nota: apenes 7,43 sobre 10.