Boles de xel p'aguiyar el tactu, leds de colores qu'atrapen la vista, distintos tipos de sal pa poner a preba'l gustu y arumes familiares qu'espierten l'olfatu, too ello mentanto una música relaxante se mete nos oyíos. Asina, dellos alumnos del Nazaret activen los cinco sentíos na acabante inaugurar aula multisensorial del centru. “Llevábemos años cola ilusión d'empezar esti proyectu, pero nun atopábemos el momentu pa entamalo”, afirma la profesora de pedagoxía terapéutica y xefa d'estudios, Belén Sainz. 

Estos espacios educativos, tamién conocíos como “Snoezelen”, nacen n'Holanda nos años 70 cola cuenta de fomentar la interacción cola redolada al traviés de les sensaciones que se perciben d'ella. “La idea ye que tean relaxaos por qu'esperimenten y xueguen”, esplica la tutora d'infantil, Carmen Rodríguez, que se declara una mera espectadora de tolo que deciden facer los protagonistes de les xornaes. 

Dacuandu estes técniques d'estímulu aplíquense a menores con necesidaes especiales, pero son recomendables pa esconsoñar l'interés de cualquier pequeñu. Por eso, el Nazaret convirtióse nún de los centros educativos pioneros n'Asturies que destinen l'área a estudiantes d'infantil y primero de primaria: “Ye otra visión... Más pedagóxica que terapéutica”. 

La intención ye xubir a los neños a esta sala del tercer pisu, siquier una vegada a la selmana, onde los van esperar distintos decoraos y temátiques por sesión. Nesta ocasión, con motivu del estrenu, l'aula vistióse con elementos marítimos. Los neños entusiasmaos realicen distintes actividaes en pareya. Alba y Julia entretiénense pegando estrelles de mar nun enorme tubu que xenera burbuyes de colores. Gael y Triana tán envolubraos en lluces y miren distintos animales de plásticu encapsulaos nun bote: “Hai un pulpu y una aguamala”, esclamen. Lucía y Pablo conquistaron el “tipi” onde pescuden por aciu llinternes les especies que s'escueden nel so interior. Ashley y Rebeca pesquen pececinos que tienen que dixebrar por color. Sara y Jaime realicen percorríos con pequenes “perlles d'ostres”. Gonzalo y Lucia xueguen con una plataforma que propón prebes de psicomotricidá ya inxeniu. 

Al ratu van rotando pa poder restolar toos y caún de los requexos. “Quién pudiera ser neñu”, esclamen los miembros de l'Asociación de Madres y Padres d'Alumnos (Ampa), que nun quixeron perdese l'empiezu d'esta aventura sensorial. “Nada d'esto sería posible ensin la implicación de proxenitores, docentes y la congregación de Fíes de María Madre de la Ilesia”, cuenten les maestres ellí presentes, qu'aseguren que la collaboración tomó dende la pintura o la llimpieza hasta remozicar les instalaciones. 

A lo llargo de les siguientes xornaes van representase cuentos con lluces fluorescentes sobre un focu de lluz negro y van dir camudando los xuegos y motivos decorativos. “Non solo van aprender y desarrollar habilidaes. Creo que van disfrutar enforma”, asegura Rodríguez. Conozse que los párvulos del Nazaret atoparon el sentíu a les xornaes lectives del centru.