Los alérxicos al polen enfrenten una primavera sele na cornisa cantábrica, Navarra y La Rioxa. Esti ye'l pronósticu formuláu esti día pola Sociedá Española d'Alergoloxía ya Inmunoloxía Clínica (SEAIC), por cuenta de la llegada de la primavera. Cuéntase con que n'España hai más d'ocho millones de persones alérxiques a pólenes. 

¿Qué-yos aguarda a los alérxicos asturianos? “La temporada d'alerxes va ser más duradera que l'añu pasáu y d'una intensidá asemeyada, anque con dalgún picu más altu”, sorrayó esti día Dolores Quiñones, xefa de la sección d'Alergoloxía del Hospital Universitariu Central d'Asturies (HUCA)

Y esplícase la doctora Quiñones: “Por cuenta de l'enclín climáticu d'amenorgamientu de precipitaciones y aumentu de temperatures, les estaciones políniques n'Asturies tán allargándose. Los niveles de polen van ser asemeyaos a años previos, pero los picos polínicos van ser más elevaos”. 

Nestos dos años de pandemia, señaló l'alergóloga del HUCA, los pacientes alérxicos viéronse beneficiaos pol usu de los mázcaros. “Va ser habitual ver más mázcaros nel esterior nestos meses, anque yá nun sía obligatorio. Ye una midida que resultó abondo eficaz pa menguar los síntomes”, albidró Dolores Quiñones. 

Según la SEAIC, pa los alérxicos a pólenes de gramínees la primavera va ser sele: va dir ente los 1.000 granos per metru cúbicu de Logroño y A Coruña, y los 3.000 granos d'Uviéu y Vitoria. Ciudaes como Santander, Bilbao, Pamplona y San Sebastián van tener niveles de gramínees aproximao a los 2.000 granos per metru cúbicu. 

Sara Díaz Angulo, alergóloga del Centru Médicu d'Asturies, señala como factor relevante “la escasez de precipitaciones n'Asturies nos pasaos seronda ya iviernu”. Esti fechu “va contribuyir a un amenorgamientu de la concentración de polen na atmósfera”. Sicasí, per otru llau, “l'agua pela primavera favorez el depósitu del polen nel suelu y, d'esti xeitu, nun entra en contactu col sistema respiratoriu”. Arriendes d'ello, “si sigue ensin llover, los niveles de polen van caltenese a lo llargo de más díes qu'otres primaveres más pluvioses”. 

L'iviernu qu'acaba de concluyir foi'l segundu más secu n'España nos postreros 60 años, solo per detrás del de 2012. Amás, vino precedíu d'una seronda tamién seca. En términos xenerales, la Sociedá Española d'Alergoloxía ya Inmunoloxía Clínica (SEAIC) fai rescamplar que'l cambiu climáticu ye una realidá incuestionable”. Y qu'ún de los sos múltiples efectos ye l'aumentu de les enfermedaes alérxiques por pólenes por aciu de trés circunstancies: l'aumentu na concentración, un mayor tiempu d'esposición y una mayor agresividá. 

La medría de la temperatura causada pol cambiu climáticu xunto colos gases d'efectu invernaderu, como'l CO2, actúen como fertilizante de les plantes contribuyendo al aumentu na producción de pólenes. “La xuba de les temperatures ta adelantrando'l periodu de polinización y retrasando la so finalización, incrementando asina'l ciclu d'esposición a los pólenes”, aseveró'l doctor Ángel Moral, presidente del Comité d'Aerobioloxía de la SEAIC. 

De los más d'ocho millones d'españoles con alerxa a los pólenes, siete millones son alérxicos a gramínees, siguíos n'orde decreciente por alerxa al olivu, arizónica, pládanu de solombra, salsola y parietaria. Na cornisa cantábrica, Navarra y La Rioxa, los pólenes más frecuentes son los de gramínees y abeduriu.