La Catedral d'Uviéu yá ta preparada pal entamu de les obres na torre. El cabildru y los trabayadores de la Sancta Ovetensis peracaben los detalles primero qu'empiecen unos trabayos que van permitir potenciar les visites a esa parte del templu. Anque'l deán Benito Gallego tresmitió va unos díes daqué esmolición por un eventual retrasu na llegada de dellos materiales necesarios pa la obra, les perspectives nun camudaron. Na Catedral d'Uviéu confíen nun entamu inminente de los trabayos, que tienen de concluyir alredor del mes de xunetu, en plena temporada alta.
Ello ye que los preparativos yá empezaron. Jennifer Puertas, coordinadora d'actividá cultural de la Catedral, guía a LA NUEVA ESPAÑA nun percorríu pela torre, na que ye de facto la última visita primero qu'empiecen les esperaes obres. Na mesma entrada de la estructura prepárense yá escalones marcaos con clarión: son los más desgastaos, aquellos que Jorge Hevia, responsable del plan director, señaló pa la so rehabilitación.
A lo llargo del ascensu pela estrecha escalera de cascoxu de la torre, empieza a conocese por qué hai tantu enfotu nel cabildru y nel Conceyu –que financia los trabayos con una aportación de 100.000 euros– en que les visites a la torre se conviertan nun atractivu turísticu de primer orde pa la ciudá. Al traviés de los vanos empiecen a aprucir espectaculares vistes de la ciudá. Una vien bien al casu: la de la cai Santa Ana. Ehí mesmo, nel costáu sur de la torre, va instalase un andamiu esterior con un montacargues, que va llegar hasta la sala de campanes, a 30 metros d'altor, y va sirvir pa introducir los materiales necesarios pa completar les obres, y por que los mesmos obreros puedan entrar directamente a esa zona de la torre.
Per tou'l primer tramu de la xubida nótense ausencies nel pasamanes de piedra, que coles mesmes va ser restauráu. Yá na sala de contrapesos, Jennifer Puertas señala los moldes d'escayola realizaos por Luis Menéndez Pidal pa la restauración del templu tres la Guerra Civil, a los que se-yos va facer una fonda llimpieza enantes d'encuriosalos pa que compongan una pequeña amuesa nesi puntu del percorríu. Nesa mesma sala, Puertas entra per una puerta que da a la terraza, na que puede vese de cerca'l rosetón.
Esi espaciu tien hestoria: ellí atrincheráronse cuatro trabayadores de Duro Felguera, pa reclamar la recolocación de 39 obreros que fueren despidíos pola empresa. L'encierre empezó na viéspora de la Nuechebona de 1996, y allargóse casi un añu. Puertas esclaria qu'esi espaciu de la torre, de pequeñes dimensiones y accesu entrechu, nun se va incluyir nes visites turístiques a la torre.
Un poco más enriba ta la sala del reló, a la que se-y va facer una llimpieza del mecanismu. Amás, van abrise vanos na caseta de madera, anguaño zarrada, por que los visitantes puedan ver esa maravía mecánica.
Sobre esti espaciu asitia la sala de campanes, onde se va concentrar el gruesu de les actuaciones. El suelu de madera va ser remocicáu dafechu, tamién les escaleres, y va facese un tratamientu específicu pa saniar les estructures que sostienen les campanes. Tocantes a los preseos puramente dichos, va facese-yos una llimpieza que tamién s'estenderá a los murios, por que los visitantes puedan contemplar los grafitis históricos que se conserven nesta sala: son inscripciones feches por canteros, relixosos y pelegrinos.
Nel últimu tramu de la xubida, el que conecta'l campanariu col mirador de l'aguya, va instalase una baranda tubular pa facilitar l'accesu. Estes actuaciones, complementaes con una meyora del llume y la instalación de paneles informativos, van permitir convertir la torre de la Catedral nun gran faru del turismu pa Uviéu.
