Odes al alcohol, mensaxes reivindicativos, firmes espaxaraes o caricatures de temática sexual. Toa triba de mensaxes cueyen nes pintaes que tomen les parés de les cais del cascu históricu d'Uviéu con más presencia que nunca a escases feches de la llegada d'un proyectu col que'l Conceyu quier atayar un problema eleváu a la categoría de vergonzante. Son yá munchos años, más bien llustros, los que la capital asturiana lleva batallando contra los grafitis anónimos. Depués de dellos planes específicos de llimpieza efectivos namás nel curtiu plazu, l'equipu de gobiernu enferrónase al sistema de videovixilancia que va entrar en funcionamientu “en poques selmanes” por que les cais del cascu históricu vuelvan llucir percurioses.
L'equipu de gobiernu va echar el restu con una doble vía d'actuación que, amás de fiar al poder disuasoriu de la vixilancia con trece cámares d'última xeneración les 24 hores al día, inclúi un ambiciosu plan de choque de llimpieces que va precisar de permisos de dellos propietarios privaos pa borrar hasta la última gota de pintura de la vista de los pasiantes.
Anguaño nun esiste requexu nengún del Uviéu monumental ensin resclavu d'esta práctica a mediu camín ente l'arte urbano y el vandalismu incívicu. La zona de Postigu ye de les más damnificaes, anque'l caleyón dedicáu a Ildefonso Martínez quiciabes sía'l que más escandalexa por mor de la esposición de pintaes en caúna de les sos fachaes.
L'ecosistema que conformen les cais tomaes polos chigres de copes tampoco se llibra. Les persianes de los locales de Mon y Canóniga son claru exemplu d'ello, magar los ataques con espray de colores cuten tantu o más fuerte nes fachaes d'edificios como la Casa Sacerdotal, o los inmuebles partíos a entrambos llaos de la cai San Vicente. Mención aparte merecen les redolaes de les places del Paragües y Sol, dos de los puntos onde se va estremar la vixilancia per mediu de les nueves cámares.
De funcionar esti apueste municipal va acabase con una llaceria que supunxo importantes desembolsos y dolores de cabeza al Conceyu. En 2009, cuando inda yera alcalde Gabino de Lorenzo, el Consistoriu invirtió 80.000 euros nun fondu llaváu de cara del Antiguu. L'actuación resultó un parche y nueve años más tarde el gobiernu tripartitu formáu por PSOE, Somos ya IX repitió fórmula, esta vegada con un gastu de 60.000 euros, que depués s'esmució ente una proliferación inda mayor de les pintaes.