Una esposición, un documental, un llibru, dos conciertos y una mesa redonda. Tol programa de la 43 Selmana de les Lletres Asturianes va xirar alredor del músicu y dibuxante xixonés Ígor Medio, fináu n'accidente de tráficu en 2006 y autor de les tires de “La familia Castañón” que se publicaren en LA NUEVA ESPAÑA ente 1997 y 2005. La cita va tener llugar del 3 al 6 de mayu y va ser la primer vegada qu'una persona nacida na década de los setenta del sieglu pasáu reciba l'homenaxe de les Lletres Asturianes. 

Los actos abrirán el día 3, a les 12.00 hores, nel paraninfu de la Llaboral Ciudá de la Cultura cola presentación del llibru conmemorativu “Ígor Medio. El carbón y l’arena”. La publicación, editada pola Conseyería de Cultura, Política Llingüística y Turismu pa la ocasión, axunta nueve artículos qu'analicen el legáu del dibuxante ya inclúi numberosos testimonios gráficos de la so vida y obra. Tres ello, va emitise'l documental “Onde soi quien quiero ser. Una semblanza d’Ígor Medio”. La programación va siguir a les 18 hores nel Muséu Barjola cola inauguración de la esposición “Xente llano de Xixón. La obra gráfica d’Ígor Medio”. Esta muestra va tar abierta hasta'l vienres 3 de xunu nel siguiente horariu: de martes a sábadu, de 11.30 a 13.30 y de 17.00 a 20.00 hores, y domingos, de 12.00 a 14.00 hores. Dempués de la inauguración, va tener llugar una “jam session”, cola participación d'Alberto Ablanedo, Rubén Bada, Pepín de Muñalén y Dolfu R. Fernández. 

Nel diseñu del programa d'actividaes participaron estrechamente la Dirección Xeneral de Política Llingüística con Ruma Barbero, cofundador xunto a Ígor Medio del grupu “Felpeyu”, y Norman Fernández Tascón, autor de delles monografíes y artículos sobre'l cómic. Asina, ún de los platos fuertes de la Selmana de les Lletres Asturianes va ser la celebración d'un gran conciertu homenaxe'l miércoles 4 de mayu a les 20.00 hores en Llaboral Ciudá de la Cultura, nel que van participar más d'una ventena de músicos y grupos. Va tar a la cabeza “Felpeyu”, acompañáu polos integrantes de “Tuenda”, “DRD”, “La Bandina’l Tombo” y “Corquiéu”. Al escenariu van xubise más: José Manuel Tejedor (gaita), Mapi Quintana (voz y contrabaxu), Bree Delian (cordión), Alberto Sánchez (flauta), Xuan Nel Expósito (cordión), Cástor Castro (flauta), Félix Castro (cordión), Toño Gómez (vigulín), Xel Pereda (guitarra y voz) ya Isidro Suárez (flauta). 

El xueves día 5 va siguir la música, con otru conciertu, nesta ocasión n'Uviéu, nel Auditoriu Príncipe Felipe, al cargu de la Orquesta Sinfónica del Principáu d'Asturies (OSPA) y so la dirección del maestru Daniel Sánchez Velasco. El recital va empezar a les 20.00 hores. Pa la última xornada, la del vienres 6, Día de les Lletres Asturianes, ta prevista la mesa redonda “¿En qué andaría Ígor? El cómic asturianu güei”, a les 18.30 hores nel Muséu Barjola. L'actu va tar moderáu por Chechu García y nél van participar Raquel Lagartos, Ruma Barbero y Ernesto García, “Neto”. 

Por cuenta de la 43 Selmana de les Lletres Asturianes, la Conseyería de Cultura, Política Llingüística y Turismu editó tamién el llibru “Contos eonaviegos”, una escoyeta de 28 relatos d'otros tantos autores publicada pa la ocasión. Esti volume, pal estremu occidental, y el yá citáu “Ígor Medio. El carbón y l’arena”, pal restu de la comunidá, son les obres que se van poner gratuitamente a disposición de les persones que merquen un llibru o un discu n'asturianu o en eonaviego el vienres 6 de mayu. Un total de 57 llibreríes y tiendes de discos del Principáu collaboren cola Dirección Xeneral de Política Llingüística na promoción y celebración d'esta efeméride. 

La Selmana de les Lletres Asturianes entámala'l Gobiernu del Principáu y celébrase cada mayu dende 1980. A ella xúnense múltiples instituciones y participen d'un xeitu especial centros educativos, llibreríes, editoriales, escritores y medios de comunicación.