Asturies ye una de les trés comunidaes, xunto con Cantabria y Castiella-La Mancha, nes que l'importe del alquiler de vivienda entá nun algamó'l preciu máximu que se rexistró en 2007, nel momentu cume de la “burbuya” inmobiliaria española, previa al esbarrumbe que se produció cola crisis financiera internacional de 2008. 

Según informó esti día'l portal especializáu Fotocasa, el preciu mediu de la vivienda n'arriendu n'Asturies asitia en 8,25 euros per metru cuadráu al mes, el 4,62% inferior a los 8,65 euros de 2007.

Sicasí, la rexón nun escapó del enclín alcista del mercáu español, nel que nel pasáu trimestre conseñóse un repique depués d'un añu de cayíes. 

D'esta miente, n'Asturies la vivienda n'arriendu encarecióse'l 2,2% nel trimestre, trés décimes menos que'l promediu español (2,5%). Ye la sesta rexón na que menos repicaron los arriendos, per delantre namás de Cataluña, País Vascu, La Rioxa, Andalucía y Baleares. 

Nel comportamientu interañal, Asturies foi la novena comunidá más inflacionista, con una medría del 4,7%. Magar ello, aguanta tovía per debaxo de los niveles de 2007. En tasa añal, les mayores medríes protagonizáronles Comunidad Valenciana, Estremadura, Murcia y Cantabria. 

Nel “ranking” de precios, los 8,25 euros per metru cuadráu de promediu n'Asturies asitien al Principáu como undécima comunidá por carestía. Namás son más barates Estremadura, Castiella-La Mancha, Castiella y Lleón, Murcia, La Rioxa y Galicia 

Avilés abaratóse

De les trés grandes poblaciones asturianes, Avilés ye la única que nun s'incorporó entá al enclín alcista. Nel pasáu trimestre rexistró un descensu del 8,2% trimestral y 2,4% interañal. Otra manera, en Xixón y Uviéu los alquileres aumentaron el 4,8% y el 3,3% respectivamente respectu al trimestre anterior, y el 5,5% y 5,6%, per esti orde, en relación al exerciciu pasáu.