Bosnia nel 92, Kosovo nel 99, Afganistán nel 2003, y Ucrania nel 2022. Esi ye'l bagaxe del tresportista y escritor xixonés Alberto Fernández Puerta, qu'acaba de realizar un viaxe en tráiler hacia la frontera polaca pa llevar ayuda humanitaria procedente d'Asturies al país invadíu por Putin. Fueron trés díes de viaxe y casi 3.000 kilómetros nos que, anque nun vio en primera persona los horrores de la guerra, sí que pudo apalpar l'ambiente que se vive a les puertes de la Unión Europea. “Poder ayudar a la xente que sufre, dientro de les mios posibilidaes, ye un arguyu”, destaca. 

Fernández Puerta lleva tiempu xubiláu, pero nunca dexó del too'l mundu del tresporte. Bon conocedor del universu camioneru, nun tuvo solu nesta historia. Tienen una importancia capital nel relatu dos ONG. La primera, Alendar Asturies, foi la que s'encargó de recoyer el material humanitario. Esta entidá, al nun tener quien llevara los víveres a Ucrania, pidió ayuda. Entós entra n'escena la segunda organización. Trátase d'Ucrania Exprés, de Mieres, que yá llevó material al país presidíu por Volodímir Zelenski. Esta entidá contactó con un tercer actor implicáu, una empresa. Ye Tresportes Menéndez, una firma afincada en Xove, en Xixón. “Axuntamos y sacamos el viaxe p'alantre”, resume Fernández Puerta. 

El xixonés tampoco tuvo solu nel so periplu de 3.000 kilómetros. Tuvo acompañáu por José Iglesias Prieto, al que tol mundu conoz como “Josín”, ún de los xoferes de Tresportes Menéndez. Ente los dos partieron hasta Sotu Cangues y Posada de Llanes, que fueron les dos localidaes nes qu'Alendar recoyó material humanitario. Nesos dos puntos, atarraquitaron un tráiler nuevu con 14 tonelaes de provisiones. “El camión tien capacidá pa más, pa 25 tonelaes, pero nós díbamos enllenos”, apunta Fernández Puerta. Tres esto empobinaron camín de Polonia'l 29 de marzu. Aportaron, depués de trés díes de viaxe, a Lublin, a pocos kilómetros de la frontera con Ucrania. “Tuvimos que descargar nun almacén porque'l camión que venía recoyenos tuvo un problema y nun pudo llegar”, esplica'l tresportista. 

La historia tien un últimu flecu. Dase la circunstancia de qu'en Lublin, na so contorna, alluga'l campu d'esterminiu nazi de Majdanek. La instalación ta prácticamente igual a como l'atoparon les tropes soviétiques en 1944. Nesi llugar, monumentu a la sinrazón, morrieron miles de xudíos. “Comprobar lo qu'ellí asocedió y pensar qu'a pocos kilómetros ta asocediendo una desgracia como la de la invasión d'Ucrania dexónos el corazón encoyíu”, ataya Fernández Puerta.