Dende “Turón de Suchard” hasta “Grandas de Salime del grupu de wasap” hai un percorríu de trés años, sesenta indicadores de carretera tuneaos, cientos de kilómetros percorríos y dos calendarios solidarios. El final del camín, solo dica agora, ye'l mural “Pola salú mental”, que dende esti día lluz nún de los murios del Sanatoriu Adaro de Sama, na zona onde precisamente asitia la unidá de salú mental del área sanitaria del Nalón. Ye la forma cola que'l llangreanu Fernando Argüelles –conocíu como'l Banksyastur– quixo dar visibilidá al so llabor, popularizáu nes redes sociales colos sos xuegos de palabres cola toponimia, rotulando los cartelos indicadores de les localidaes. 

Lo qu'entamó como un entretenimientu col “Turón de Suchard” –mangáu, como'l restu d'asociaciones d'idees, con una marca de rotulador “que marcha col agua y el sol”– derivó darréu n'ilustraciones pa dos calendarios con fines solidarios: el primeru d'ellos “Pola Atención Primaria” y el d'esti añu, “Pola salú mental”. Gracies a esti postreru, llogró recaudar más de 8.000 euros destinaos a gastos p'atención psicolóxica o l'alquisición de material deportivu, informáticu o escolar, en beneficiu de delles asociaciones de la rexón.

“Amás de recaudar fondos, lo que buscaba un poco cola campaña yera reclamar más inversión pública pa salú mental. Y pidir tamién qu'esista más empatía ente la xente, y que les enfermedaes mentales dexen de ser un estigma”, cavilga Argüelles, p'axuntar: “Vivimos nun mundu gafu ya individualista y la xente tien d'ayudar a la xente. Como dicía Benedetti, hai que defender l'allegría como si fuera una trinchera”. Argüelles llogrolo, arrincando sorrises con “tuneos” como “Será por Parres”, “Woman del Caliao”, “Cuando Teberga bien” o “Les Arriondes espansives”. 

El grafiti del Adaro –fechu pol tamién llangreanu Chus Matos “SKF” y nel qu'Argüelles punxo'l so toque añediendo'l “salú mental” final– remata esta campaña, pero Banksyastur yá camienta na siguiente. Y nun refuga “ampliar fronteres”. Confiesa que-y tien ganes a “Quien calla Astorga”, “Basauri en hechos reales” y “Cierro Comillas”. “Tamién ta ‘Dios mio, dame Plasencia’, pero yá me queda un poco más llueñe”, conclúi con humor.