Trés uvieinos, una empresa ficticia y siete hores pa sacala adelantre. Esti ye'l retu al que s'enfrentaron Sergio González, Luis Méndez y Javier Pontón contra más de 700 equipos autonómicos pa facese sitiu na final nacional d'estratexa empresarial de “Global Management Challenge” (GMC), una competición internacional de xestión de compañíes. De 22 años, conociéronse en párvulos, nel colexu Auseva, y depués de tomar per distintos caminos llanzáronse al mundu corporativu col so equipu Asturacle. “D'Asturies y l'Oráculu d'Omaha, como-y llamen al inversor y empresariu Warren Edward Buffett”, espliquen. Ocurrióse-yos con pronunciación inglesa, pero les sos güeles españolizáronlu y yá suena talo y como se llee. 

L'equipu tien en realidá cuatro integrantes. El trabayu separó a Manuel Fernández de la última fase del certame y del alcuentru con LA NUEVA ESPAÑA, pero foi parte de los entamos del grupu y los sos compañeros cuenten con él. Foi Méndez quien entamó la idea, afaláu pol so profesor del Trabayu de Fin de Grau, Enrique Loredo, p'apuntase a la preba. Él, inxenieru industrial, quixo contar con compañeros fiables y con conocencies n'otres árees. González, de Derechu y ADE; Pontón, informáticu y Fernández, físicu y matemáticu nun dudaron n'axuntase. 

Formen el combu perfectu, una y bones los conocimientos que-y falten a ún sóbren-y a otru; tienen economía y nociones tecnolóxiques pa repartir. Anque, quedaron un daqué coxos cuando Fernández tuvo qu'abandonar el barcu dempués de dos rondes victorioses a los costazos, y entá con eses dificultaes consiguieron aportar a la final. 

“Aprendimos a trabayar baxo presión y n'equipu, a ponenos d'alcuerdu”, espliquen. Y añeden: “Ye una meyora a la de tomar decisiones, yá que se fai en poco tiempu y hai que decidir bien”. Amás, foi una oportunidá p'axuntase con mayor vagar. Al más puru estilu Steve Jobs nel so garaxe, montaron una pequeña oficina na habitación de Pontón na que realizar les prebes xuntos. Y ellí foi onde compartieron paeceres y planes de futuru. Agora, suañen con algamar la fase internacional del concursu.