Federico Granell (Cangas, 1974) dedicó al paisaxe asturianu, del monte a la marina, les sos últimes obres. Dende'l sábadu pasáu pueden vese en Llamazares Galería, en Xixón. Granell, ún de los artistes locales que más premios y más reconocencia atesora, percuerre nos catorce llenzos que conformen “Los paisajes que me habitan” la xeografía asturiana y, al tiempu, adientra nun viaxe interior.
“Federico Granell mora nos paisaxes que pinta y dibuxa mesmo que los paisaxes pintaos y dibuxaos moren nél. Nellos, la contemplación desinteresada y el pensamientu metafísicu caminen en paralelu”, esplica na presentación de la esposición la so comisaria, Natalia Alonso Arduengo.
Dende'l sábadu pasáu y hasta el 4 de xunu, Granell ufierta un paséu emocional que pasa peles sableres de Bayas, Mexota, Penarronda, Verdicio y Andrín, pelos pericuetos de Bermiego, Somiedu o peles orielles del llagu Ercina.
