Zitrón consigue un nuevu contratu fuera de les fronteres españoles. La empresa xixonesa, especializada en sistemes de ventilación, va suministrar y va instalar estos equipos nel túnel de Silvertown, que se va construyir sol ríu Támesis en Londres. El proyectu, valoráu en más de mil millones de llibres (unos 1.185 millones d'euros), va consistir nun pasu soterrañu pa vehículos de doble fucacu que, con un llargor aproximao de kilómetru y mediu, va trescurrir so les agües del ríu londinense.
El diseñu y la construcción del proyectu van por cuenta d'un consorciu lideráu pola española Ferrovial y nel que tamién participen les compañíes BAM Nuttall y SK Y&C. La construcción va incluyir tamién dos ramples d'entrada de más de mediu kilómetru a entrambos llaos del nuevu túnel londinense. El contratu de Zitrón inclúi'l diseñu, fabricación, ensayu, suministru ya instalación de 24 grandes equipos de ventilación.
El nuevu túnel va conectar la península de Greenwich y el distritu de Silvertown coles mires de solliviar la conxestión del tráficu nesta zona de la capital inglesa. Según un comunicáu de Ferrovial, espérase que les obres se completen nel añu 2025. Como suel pasar davezu, los llabores de la compañía asturiana Zitrón van empezar nos postreros compases del proyectu, una vegada les xeres de perforación tean remataes.
Nun ye la primer vegada que Zitrón participa en grandes proyectos de movilidá en Londres. La inxeniería xixonesa tamién collaboró na instalación de la ventilación del metro nel añu 2014. La empresa presidida por Antonio Fernández-Escandón, nuevu presidente de la patronal Femetal, suma esti contratu a una nutrida cartera de pidíos del estranxeru, pero tamién rexonales. A primeros d'añu Zitrón remató, por casu, la instalación de los ventiladores de la variante de Payares.
