Onís ta llenu de vida. Falar de la natalidá nel Oriente ye falar d'esti conceyu que llenda con Cangues d'Onís, Cabrales y Llanes, onde se rexistra la meyor tasa de nacencies de la comarca y una de les más elevaes d'Asturies. El nacimientu de siete ñácaros en 2021 encontó'l so lideralgu nesti ranking. Una cifra que consolida al pequeñu territoriu de 792 habitantes empadronaos como un oasis demográficu. Y ye que, según los datos ufiertaos pola Sociedá Asturiana d'Estudios Económicos ya Industriales (Sadei), el conceyu rexistra una tasa de natalidá bruta (nacencies per cada mil habitantes) del 8,17, casi doblando la media rexonal afitada nun 4,7. En 2019 nacieron cinco neños. En 2020 fueron cuatro y el pasáu añu llegóse a siete. Y conozse que l'enclín va caltenese. En 2022 van venir al mundu n'Onís siquier otros cinco neños. Ún d'ellos, el primeru del añu, acaba de facelo. 

L'asentamientu de pareyes moces nel conceyu –naturales d'Onís o llegaes d'otros llugares– los servicios qu'ufierta la capital del conceyu, les oportunidaes llaborales nel sector primariu y de servicios o la situación xeográfica son, pal alcalde, José Manuel Abeledo, les condiciones qu'ayudaron a que los nacimientos vaigan a más.

Hostelería

“Asitiaron pareyes moces y nun hubo l'éxodu que se produció n'otros conceyos d'alredor. Tenemos delles incorporaciones a l'actividá agraria, tomando'l relevu nes esplotaciones de los padres, y el trabayu nos negocios d'hostelería tien puxu”, añede'l rexidor. Y ye que Abeledo tienlo claro. “Equí habría más xente si hubiera más viviendes”, afirma enantes de destacar que'l Conceyu trabaya col Principáu pa tratar d'afitar población. Onís tien na so capital, Benia, con servicios importantes pal mediu rural como consultoriu médicu, escuela, sucursal bancaria con caxeru, ayuntamientu o farmacia, ente otros, que cubren les necesidaes de los vecinos nel día ente día ensin tener que movese obligatoriamente a núcleos más grandes. 

“El fechu de ser un conceyu pequeñu y tener ayuntamientu, consultoriu y poder mandar a los neños a la escuela al llau de casa fainos atractivos”, sorraya l'alcalde d'un conceyu que cuenta tamién con unes 1.500 places n'agospiamientos turísticos. 

Ún de los llugares onde más se notó esa medría de la natalidá ye'l Centru Rural Arrexuntáu (CRA) Picos d'Europa, que cuenta con aules en Mestas de Con (Cangues d'Onís), Ponga y Benia. Son casi cuarenta los alumnos matriculaos nel centru d'Onís. Ye más, la medría de matrícula nel últimu añu provocó l'apertura d'un aula nueva. Según esplica la directora, Meli Sánchez, n'Infantil hai once alumnos. Nel aula pa terceru de Primaria reciben clase once neños. 

Adriana Niembro ye natural de Benia y forma parte d'una d'eses pareyes moces que decidieron criar a los sos fíos nel conceyu. Mauro, el so fíu pequenu, con seis meses d'edá, ye ún de los siete neños que nacieron nel conceyu en 2021. 

“Esti ye un pueblu onde tenemos de too y onde se vive perbién. Tengo'l mio negociu equí y trabayo dos díes fuera. Ye una suerte que los neños puedan criase equí”, resume Adriana Niembro sobre l'atractivu d'Onís.