Asturies caltien la so llista de sableres reconocíes cola bandera azul, un distintivu de calidá que cada añu determina aquellos arenales más destacaos, con un agua óptima pal bañu, que cumplen cola lexislación ambiental, tán llimpios, disponen d'una xestión curiosa de los residuos, tienen baños públicos y tienen accesos fáciles y seguros. Asina, la bandera azul va volver a ondear nun total de 14 playes repartíes n'ocho conceyos. Son les de Rodiles y La Ñora (Villaviciosa), Arnao (Castropol), Penarronda (Castropol-Tapia), Frexulfe (Navia), Outur y Cadavéu (Valdés), Concha d'Artéu y San Pedro Bocamar (Cuideiru), Aguilar (Muros), Santa María del Mar, Salinas y Arnao (Castrillón), y Anguileiro (Tapia de Casariego). 

El reconocimientu que concede l'Asociación d'Educación Ambiental y del Consumidor (ADEAC) caltien tamién na llista al puertu deportivu de Xixón, que recuperara la so bandera yá nel añu 2018. 

Pero a los arenales axúntense tamién los llamaos “centros azules”, que se refieren a espacios museísticos o d'interpretación de conceyos que yá cuenten con bandera azul en dalguna de les sos sableres y que los sos oxetivos sían coincidentes col Programa y contribúin a concenciar a la población sobre mediu ambiente y sostenibilidá. 

Nesti apartáu, Asturies suma la reconocencia del Monte-Xardín Fonte Baxa, en Valdés, conceyu que tamién incorpora un “senderu azul”, espaciu de paséu reconocíu pola so calidá y guapura. Nesti sentíu, el conceyu de Valdés ta de norabona yá que non solo caltien les banderes azules de les playes d'Outur y Cadavéu. El monte xardín de la Fonte Baxa conviertese nel quintu centru azul d'Asturies y la sienda Punta Muyeres nún de los ocho nuevos senderos azules de la rede nacional.

“Ye positivo pa los mesmos valdesanos porque tienen nel so conceyu instalaciones y paisaxes d'una calidá medioambiental bien relevante”, señala l'Alcalde, Óscar Pérez. Amás considera qu'estos reconocimientos ameyoren la imaxe del conceyu. “Tenemos cuatro banderes, pero creo que tenemos capacidá p'aspirar a más”, asegura'l rexidor valdesanu. 

El monte xardín de la Fonte Baxa, próximu a L.luarca, constitúi un espaciu natural, cultural y paisaxísticu con una privilexada situación, sobre lo alto del cantil de les sableres l.luarqueses, ufiertando espectaculares vistes. Amás, cuenta con una gran diversidá d'especies vexetales. 

Asturies tien reconocíos como “centros azules” el Muséu Marítimu d'Asturies (Gozón), el Centru d'Interpretación del Mediu Marín de Peñes (Gozón), el Muséu d'Ancles Phillipe Cousteau (Castrillón) y la Mina d'Arnao (Castrillón). 

Les banderes azules concédense a aquellos conceyos que les soliciten, depués d'una inspección de los sos arenales. Dalgunos pueden escarecer d'elles, ensin qu'eso menosprecie la calidá de les sos sableres. Llanes, por casu, decidió caltenese al marxe d'esti sellu.