La Conseyería de Cultura, Política Llingüística y Turismu convocó la sesta edición del Premiu Nel Amaro de teatru profesional n'asturianu o gallego-asturianu, que pretende contribuyir a consolidar, arriquecer y prestixar estes dos llingües nel ámbitu del arte dramáticu. Nesta ocasión, la propuesta ganadora va recibir 6.000 euros, amás d'una pieza artística.

Al gallardón puen optar obres de compañíes profesionales yá estrenaes, tanto orixinales como versiones o adaptaciones de títulos n'otres llingües, que nun resultaren finalistes na edición anterior. El plazu pa presentar los proyectos acaba'l 6 de xunu.

Un xuráu formáu por persones espertes en teatru y llingua asturiana va encargase d'escoyer les propuestes finalistes. Les compañíes escoyíes van representar les sos obres nel VI Festival Nel Amaro de Teatru Profesional, entamáu cola collaboración del Conceyu d'Uviéu, que se va celebrar los cuatro primeros vienres d'ochobre nel Teatru Filarmónica. Depués de les actuaciones, el xuráu va decidir la compañía ganadora.

Como parte del reconocimientu, Cultura va contribuyir a la promoción de la obra premiada nos medios de comunicación y va promover la so representación nos conceyos, al traviés del circuitu Autores nel Camín, del programa Asturies, Cultura en Rede.

El palmarés d'esti galardón, instauráu en 2017, inclúi les obres 'Llázaro de Tormes', de Carlos Alba (2017); 'Hansel y Gretel', d'Higiénico Papel Teatro (2018); 'Les rellaciones peligroses' (2019), de Factoría Norte; 'El viaxe de Covaletti', tamién d'Higiénico Papel Teatro (2020), y 'La reina de la guapura de Leenane', de Nun Tris (2021).