L'Academia de la Llingua Asturiana abrió'l plazu de matriculación pa facer la prueba de conocencia d'asturianu, que va ser el día 28 de mayu y da derechu, a les persones que la superen, al diploma oficial de conocencia de l'Academia de la Llingua, el primeru de los trés que concede.
L'Academia vien faciendo dos convocatories anuales d'esta prueba. Sicasí, anguaño namás va haber una convocatoria única pola situación sanitaria.
Nuna anuncia na so páxina web, l'Academia informa de la composición de la prueba: una parte de teoría gramatical (conocencia y dominiu del funcionamientu gramatical del asturianu y de la normativa académica); otra de práctica escrita (empleu amañosu de la llingua, puestu en práctica gracies a exercicios gramaticales y de composición escrita); y otra de práctica oral (empléu faláu de la llingua, nuna situación real o imaxinaria, que se va valorar nuna conversación colos miembros del xuráu calificador).
Amás, la prueba tien una estaya de llingua y sociedá pa demostrar la conocencia de la situación de la llingua dientro de la sociedá asturiana asina como del procesu de normalización en que ta inxerta.
El plazu de matrícula acaba'l 25 de mayu. A les persones declaraes aptes nes pruebes citaes, l'Academia va da-yos un documentu onde s'afite la conocencia nel nivel 1 o básicu. Les persones que nun superen les pruebes del nivel 1 podrán presentase a nueves convocatories toles vegaes que-yos pruya.
