Potabilización d'agua por aciu de tecnoloxía led ultravioleta. Esti ye'l resultáu d'un proyectu d'investigación denomináu “Led-water” desenvueltu por Idonial nel Parque Científicu Tecnolóxicu d'Avilés en collaboración cola Universidá d'Uviéu pa la empresa xixonesa Hidritec. La “Y” na I+D+I asturiana. La resultancia va tener non solo enormes beneficios pa la compañía, sinón usos múltiples, inclusive pa la desinfección de material quirúrxico. 

El nome completu del proyectu ye “Desarrollo de un dispositivo basado en tecnología led UV para una desinfección eficiente y sostenible en sistemas de tratamiento de aguas”, y foi financiáu nuna parte importante del so costu pol Idepa na convocatoria de 2020. 

Sergio Meana, director xeneral d'Hidritec, y Nerea Fernández, responsable d'I+D de la compañía, nun escondíen el so prestu colos resultaos d'una investigación qu'empezó va un añu. 

Hidritec dedícase a la fabricación de plantes de tratamientu d'agua de tipu compactu, modular y tresportables. Por aciu de contratos llave en mano, los sos veceros atópense non solo n'España, sinón en dellos países del mundu. 

“Ún de los problemes qu'atopábamos yera la desinfección, porque cada vez ye más complicao consiguir el cloru, y hai delles tribes de microorganismos qu'inclusive lu aguanten. Asina que queríemos atopar un sistema alternativu y que lu pudiéramos integrar en toles plantes y nun tuviera un consumu enerxéticu eleváu. Munches d'estes plantes asitien en zones onde nun hai enerxía eléctrica y tienen que funcionar con un pequeñu xenerador. Esto ye, queríemos un sistema mui efectivu, que nun dependa de nengún productu químicu y con un consumu mínimu, esplica Meana énte un depósitu de muestra esperimental. 

Un proyectu bien ambiciosu de mala solución. Hasta qu'apaeció Idonial. Ramón Bernardo de la Rúa, director del departamentu de Plásticos, Materiales activos y Superficies, esplicó que'l casu d'Hidritec ye “un exemplu claru” de la relación qu'esiste ente un centru tecnolóxicu y les empreses pa sacar alantre proyectos d'I+D+i. El primeru pon a los investigadores pa desenvolver tecnoloxíes y les segundes, la necesidá y l'usu al productu que se llogra. 

Idonial realizó nel so centru d'Avilés un proyectu européu que remató en 2018 y nel que “aprendimos, ente otres coses, a encapsular lluces led. Eso facíase pa llograr enerxía eléctrica fotovoltaica y proxectala con led. Lo que fiximos foi amosar esa conocencia adquirida a les empreses de la rexón, y Hidritec plantegónos la so problemática. Si sabemos encapsular lluces led por qu'aguanten albentestate, y sabemos qu'hai tecnoloxía cola que se puede desinfestar agua con lluces led ultravioletes, vamos poder encapsular estos pa somorguiar na agua”. 

Asina que en 2020, Ana Martínez, investigadora del grupu de materiales electroactivos, púnxose al llabor. “La radiación ultravioleta ente 200 y 300 nanómetros actúa nel ADN de los microorganismos y fai que nun se reproduzan. Basándonos neso, surdió la idea de desarrollar un dispositivu qu'amás fuera flexible, con polímeros especiales pa somorguialu n'agua y que dexaren tresmitir la radiación ultravioleta y nun la absorbiera”. 

El trabayu empezó con un dispositivu led d'un centímetru cuadráu y ente 260 y 380 nanómetros, y avanzóse hasta utilizar 10 lluces led distintes, aplicando la tecnoloxía a una serie de bacteries y hongos y siguiendo la lexislación española, qu'establez los criterios sanitarios de la calidá de l'agua pal consumu humanu. 

Una led potabilizadora en menos d'un minutu

El departamentu de Bioloxía Funcional, y en concretu'l de microbioloxía de la Universidá d'Uviéu, encargóse d'analizar los resultaos, y llegó a la conclusión de qu'ún de los diez utilizaos yera'l más prometedor, el qu'amosaba mayor relación calidá-preciu.

“Los ensayos enseñaron que col agua en movimientu llegamos a una viabilidá del cero por cientu nun minutu. Un led en 80 milillitros potabiliza l'agua en menos d'un minutu. Llegó a probase en cinco llitros con 18 lluces led y la resultancia foi escelente nunos dos minutos, y con unes concentraciones de bacteries y hongos que nun s'atopen na naturaleza. Nun habría agua tan contaminada”, esplica Ana Martínez. 

Esta tecnoloxía va permitir a Hidritec “fabricar potabilizadores de menor tamañu, más compactes y con un usu más eficiente”, asegura Sergio Meana. Tamién podrá usase pal tratamientu d'agües residuales destinaes al riegu o baldéu, y pa la desalación y ósmosis inversa, al entamu del procesu, pa evitar la crecedera bacteriolóxica na membrana ensin productos químicos. El siguiente retu: que funcione con enerxía fotovoltaica.