De la lluz a los campos magnéticos. El carbón dio definitivamente pasu al arte nel pozu Santa Bárbara de Turón (Mieres). La inauguración de la intervención escultórica “Voladuras controladas” garró esti día'l relevu de la esitosa amuesa que l'añu pasáu protagonizó'l británicu Anthony McCall, col so proyectu “Luz Sólida”. “Foi daqué espectacular, d'enorme calidá”, apuntó Herminio Álvarez Fernández en referencia al trabayu de McCall. El reconocíu artista d'A Caridá asumió agora'l retu de xenerar un nuevu xuegu visual coles formes estuzaes de la catedralicia sala de compresores del pozu Santa Bárbara.

La muestra, na sala de compresores del pozu Santa Bárbara. | L. Murias

La histórica mina de Turón, conocida como La Rabaldana, enllenóse de magnetismu al traviés de la propuesta escultórica d'Herminio. Los sos equilibrios imposibles floten peles instalaciones mineres remocicaes nun exerciciu d'ingravidez plasmante: “Dende'l primer día que visité'l pozu tuvi claro qu'ésta nun podía ser una esposición al usu”, apuntó esti día l'artista asturianu. “Busqué intervenir nel espaciu, integrando tola estructura del edificiu nel proyectu, dende los tubos hasta los techos”. 

A Herminio fíxo-y ilusión metese peles coraes d'un pozu mineru, nesti casu, clausuráu en 1995 depués de más d'ocho décades de dura actividá extractiva. “Un terciu aproximao de les obres son nueves ya incluyimos un homenaxe directu a los mineros”, señaló l'autor xusto enantes d'inaugurase la muestra, ensin desvelar la sorpresa. 

El Pozu Santa Bárbara, primer esplotación minera declarada Bien d'Interés Cultural (BIC) n'España, convirtióse por méritos propios nun espaciu d'intervención artística de vanguardia y referencia. Hasta'l 31 de xunetu podrá visitase “Voladuras controladas”. El conceyal de Cultura de Mieres, Juan Ponte, destacó esti día la proyección internacional d'Herminio. Y ye que la so producción artística ta repartida per Canadá, Colombia, España, Estaos Xuníos, Francia, Xapón, Panamá o Reinu Uníu. Ponte remarcó igualmente l'envoltoriu de la esposición: “Tamos nun llugar históricu, que contribuyó a forxar el nuesu heriedu cultural”. 

 Herminio tamién valora l'insospecháu allugamientu nel que trabayó: “Dióme más respetu qu'esponer nel Niemeyer”, apuntó con naturalidá. 

“Con estes voladures controlaes, Herminio rinde equí en Turón un homenaxe ingrávidu al arte, por aciu d'obres prodixoses nes que nada toca nada, colorao sobre negro, blanco sobre blanco, proxectando solombres y reflexándose nun espeyu o sobre un cristal”, señaló Luis Feás Costiella, comisionáu de la esposición. 

Con “Voladuras controladas” podrá disfrutase esti branu en Turón de la obra d'Herminio, con pieces yá conocíes y otres creaes pa la ocasión. Tol conxuntu “flota” nel interior de la sala de compresores del pozu mierense. La recuperación d'esti inmueble, construyíu en 1915 y modificáu en 1960, supunxo l'actuación más importante de la rehabilitación realizada na esplotación en 2015 con daqué más de 600.000 euros. El Conceyu, n'evaluando distintos alternatives, apostó por convertir esti gastáu enclave industrial nun centru d'arte. Y los resultaos tán hasta'l momentu respondiendo a les previsiones. 

El Conceyu de Mieres confía en que la muestra d'Herminio en Santa Bárbara xenere una espectación asemeyada a la qu'amenó la esposición d'Anthony McCall. Lemercier va llegar a Turón na seronda, y Schumann, la primavera que vien. Una mina d'arte.