L'Academia de la Llingua Asturiana publicó'l númberu 25 de 'Cultures. Revista Asturiana de Cultura', que nesta ocasión ofrez un análisis coral que suma la reflexón antropolóxica coles miraes técniques y académiques dende la xeografía y la economía.

El monográficu 'La cultura asturiana, na encruciyada' dedica les sos primeres fueyes al artículu 'Cambiu, crisis y recambiu: la sociedá rural asturiana, ente la traxedia y la esperanza', firmáu por David Rivas.

José Feito, entrevistáu por Roberto González-Quevedo, fala de 'Sincretismu perversu ya síntesis adautativa eficiente: dous conceutos pa entender l'escenariu asturianu de desarrollu rural'. Per otru llau, Xosé Nel Riesgo analiza una parte de la so trayectoria profesional en 'Acabación de la memoria del paisax asturianu'.

Xosé Alba contribúi al númberu 25 de Cultures con 'Área Metropolitana Central d'Asturies: la ciudadona que nos tien de poner nel mapa'. Zarra'l bloque monográficu'l propiu director de la revista, Roberto González-Quevedo con 'Los campesinos y el destín de la cultura asturiana: de la familia tradicional al futuru inseguru'.

Dos faces más completen esti númberu. Na etnográfica, Alberto Álvarez Peña escribe de 'Cuentos maraviyosos y d'encantamientos'. Xuan F. Bas y Yolanda Cerra faen homenaxe y estudien a l'autora de la primer obra antropolóxica asturiana: Purificación Viyao Valdés.