Crear servicios de calidá qu'aumenten la presencia de la llingua na vida social d'Asturies, asesorar a los conceyos sobre la ellaboración y promulgación d'ordenances en materia de llingües propies, planiar cursos, collaborar nos procesos selectivos pa que s'evalúen les conocencies llingüístiques de los aspirantes y asoleyar una imaxe positiva de la llingua asturiana. Estes son delles de les funciones que va tener la nueva Rede de Normalización Llingüística, que'l so decretu de creación publicóse la selamana pasada nel Bopa. 

Ye un instrumentu, según esplica'l Gobiernu, que “va permitir reforzar la coordinación ente l'Alministración autonómica y les corporaciones locales pa promover l'usu institucional y públicu del asturianu y el eonaviego”. L'órganu recién creáu, “nun va tener nengún costu extra”, según esclarien fontes de la Conseyería de Cultura y de Política Llingüística. Esto ye asina, porque la rede yá esistía; lo que se fai agora, espliquen, ye regulala y da-y soporte xurídicu.

N'esencia, el so oxetivu principal ye “reforzar entá más el papel normalizador” de la llingua colos servicios esistentes nos conceyos. El decretu tamién concibe la Rede como “un pasu previu al establecimientu d'un futuru consorciu de política llingüística”. L'asociación Xeira criticó esti día que nel documentu apaeza'l nome de “eonaviego” en llugar de “gallego-asturianu”, que, aseguren, ye'l términu que se venía utilizando hasta agora.