Asturies va dir a Lorient con tou. El Principáu ye l'invitáu d'honor na 51.ª edición del Festival Intercélticu, que se celebra na localidá bretona del 5 al 14 d'agostu. Una oportunidá pa enseñar tol músculu del ricu folclore astur, que la Conseyería de Cultura, Política Llingüística y Turismu nun quier dexar pasar. El Principáu destinó 200.000 euros al pabellón d'Asturies nel Intercélticu, al que va llevar una decena de conciertos, delles actividaes lliteraries y la esposición “Llabor”, del artista llavianés Ricardo Villoria.
El protagonismu asturianu va dexase notar en Lorient dende la inauguración mesma del festival. El 6 d'agostu, nel escenariu de Le Théâtre, va presentase l'espectáculu “Música pa tornar páxaros”, dirixíu por Mapi Quintana y dedicáu a la memoria del estrañáu Elías García, fináu en 2019.
A lo llargo de les diez xornaes del festival, les actuaciones nel pabellón asturianu van ser continues. Hasta nueve artistes y bandes asturianes van pasar per esi espaciu: “Llevólu’l Sumiciu”, Eva Tejedor & Les Pandereteres, “¿Aú?”, Rubén Alba y Nel de Pumea, “Algaire”, “Baxel”, La Garrapiella y Monteavaro, Muñalén & Rodrigues.
El sellu asturianu en Lorient va dexase notar más allá del pabellón rexonal. Nel programa oficial del certame incorporáronse otros artistes de la rexón como Rodrigo Cuevas, José Manuel Tejedor, Silvia Quesada, “Proyectu Breizh Asturies”, “Cerezal”, Javier Menéndez, “L-R”, Fabián Fernández, la Banda Gaites Llacín y el Grupu de baille Trebeyu. Amás, “Llan de Cubel” y el gaiteru José Ángel Hevia van protagonizar el conciertu de la “Gran nueche de Asturies”.
Na fastera competitiva del festival, cuatro gaiteros asturianos competirán por llevar el prestixosu Troféu MacCrimmon. Van ser Fernando Vázquez, Jaime Álvarez, Daniel Meré y Diego Lobo.
Volviendo al pabellón, que va tener 375 metros cuadraos, con un escenariu pa los conciertos, pero tamién con un área destinada a enseñar la gastronomía y los productos rexonales, cuntando amás con un restorán y una zona d'escanciáu de sidra. Amás, va presentase la esposición “Llabor”, na que Ricardo Villoria compon un relatu autoficcional sobre la rexón y la minería al traviés de la fotografía, trabayos audiovisuales ya instalaciones.
La Conseyería de Cultura, Política Llingüística y Turismu va llevar amás a escritores en llingua asturiana que van participar en charres y meses redondes pa falar sobre'l presente de la lliteratura n'asturianu.
