Na macro ufierta d'empléu públicu estatal de 2022 hai, sobremanera, places d'alministrativu, xestor, policía nacional ya informáticu. Van suponer bona parte de los procesos selectivos que se van abrir primero de qu'acabe l'añu. 

El Ministeriu de Facienda y Función Pública publicó esti día nel Boletín Oficial del Estáu la Ufierta d'Empléu Públicu (OEP) pa 2022, que ta compuesta por un total de 44.787 places, cifra que supon el mayor refuerzu de la plantiya de l'Alministración Xeneral del Estáu en tola so historia, según destacó'l Gobiernu. La ufierta ordinaria, al marxe de los puestos d'estabilización, inclúi 34.151 places (25.471 pa l'Alministración del Estáu, 4.992 pa los Cuerpos y Fuerces de Seguridá del Estáu, 1.951 pa les Fuerces Armaes y 1.732 p'Alministración de Xusticia) y d'elles 22.004 son d'ingresu llibre. 

Centrándose nel personal funcionario de nuevu ingresu na Alministración del Estáu, ente los del subgrupu A1 destaquen por númberu les 400 places d'informáticos, 346 de científicos, 301 d'inxenieros, 153 de técnicos de l'Alministración de la Seguridá Social, 140 d'inspectores de Facienda, 95 d'alministradores civiles del Estáu, 90 d'inspectores de Trabayu y Seguridá Social y 84 de médicos titulares. 

Ente los funcionarios del grupu A2 destaquen les 1.870 places de xestión, 415 de técnicu de Facienda, 138 de técnicu d'auditoría y contabilidá, 131 d'ayudantes d'archivos, biblioteques y museos, y 99 de diplomaos n'estadística. 

Al respective de los funcionarios del subgrupu C1 destaquen les 3.812 places d'alministrativu, 900 d'ayudantes d'instituciones penitenciaries y 700 de técnicos auxiliares d'informática. Y finalmente, al respective de los funcionarios del subgrupu C2 destaquen les 600 places d'auxiliar de l'Alministración del Estáu. 

Na Alministración de Xusticia destaquen les 345 places del cuerpu de tramitación procesal y alministrativa, les 284 del cuerpu de xestión y les 111 de lletraos. 

Tamién son significatives na ufierta d'empléu les 330 places de secretarios y interventores de l'alministración local, les 1.671 de cabos y guardias del Cuerpu de la Guardia Civil y les 2.456 pa Policía Nacional (escala básica). 

Pola so singularidá rescamplen, por casu, les cuatro places d'astrónomu o la plaza de tripulación del buque oceanográficu García Cid. 

Los procesos selectivos previstos pa cubrir les places tendrán que se publicar primero de qu'acabe l'añu y tendrán de tar remataos primero que trescurran trés años.