Yera'l 12 de xunu de 1987. Cangues d'Onís preparaba esi día la tradicional H.oguera, nel marcu de les fiestes patronales de San Antoniu, el Nuestru, pero, un aciar accidente en “Soh.ornín”, al par del llagu Enol, na aguada canguesa del entós parque nacional de la Montaña de Cuadonga, acabó por enllutar unos festexos, quiciabes los más murnios que se recuerden por estos llares de la vieya capital del Reinu d'Asturies. Ensin duda, una fecha que punxo'l corazón nun puñu non solo a cientos de cangueses, sinón a tol mundu que siguía en vilu naquellos momentos les intenses xeres de busca de Germán Quintana Blanco. 

Trescurrieron 35 años d'aquella traxedia, al estrellase un helicópteru Dauphin Sierra 36,5, matrícula EC-EBA, contratáu pola Ertzaintza (policía autonómica vasca), que collaboraba dende facía un par de díes nos llabores de busca del neñu uvieín, de 13 años d'edá, tresmanáu cuando participaba nuna escursión, xunto a otros compañeros del so centru docente, na zona de los Llagos de Cuadonga. L'helicópteru topetó cola fastera de “Soh.ornín” y escentellóse sobre'l pavimentu de la carretera C0-4 que comunica'l llagu Enol col llagu La Ercina. 

Les siete persones que viaxaben a bordu del helicópteru finaron nel actu: Juan Carlos González Carralero, pilotu; José Renobales, copilotu, fíu del entós senador de la PNV por Vizcaya, Carmelo Renobales; Lourdes Verdes, Joseba Zabala, Luis Ángel Díez y Javier Gallástegui, estos postreros adiestradores de perros; y Corsino Suárez Miranda, coordinador de Protección Civil del Principáu d'Asturies, bomberu d'oficiu, bien conocíu nel Principáu d'Asturies al entamar l'Institutu Heráclito, asociación dedicada a combatir el fueu. 

Fueron hores interminables, xornaes agotadores y dolioses; mentanto, Cangues d'Onís yera'l focu mediáticu del país, por cuenta d'esi aciar accidente nes paraxes del parque nacional. Los festexos de San Antoniu pasaron, lóxicamente, a un segundu planu, porque, la vieya Cánicas nun taba pa folixes y diversión, sinón tolo contrario. L'ablayamientu embargaba a tol vecindariu ya inclusive trescaló fronteres. Nun yera pa menos. A éstes, nunca enxamás se supo d'aquel neñu perdíu nel área de los Llagos, Germán Quintana, pese al tiempu trescurríu. Nada menos que siete llargos llustros.