Quiciabes nun sía casual la coincidencia cuasi dafechu ente la palabra vela y l'acrónimu ELA (esclerosis llateral amiotrófica). Dende llueu, ente'l 24 de xunu y el 14 de xunetu entrambos términos van tar fundíos nún solu por obra de la solidaridá. La travesía internacional “El Camín a vela”, con salida en La Rochelle (Francia) y meta na ría d'Arousa (Pontevedra), va tener como faceta destacada la recaudación de fondos pa l'Asociación ELA Principáu, qu'integra alredor de 400 socios y da sofitu a unos 70 afectaos por esta enfermedá neuromuscular de consecuencies afarantes.
El nexu ente la prueba deportiva y el colectivu de pacientes ye Pelayo García Sánchez, uvieín de 43 años y gran aficionáu a la vela. Movíu por un vibrante espíritu de superación, engardese contra la ELA dende 2019 y emperróse n'ameyorar la calidá de vida de los sos compañeros de singladura. A eso se van destinar los fondos que s'axunten cola venta de milles de chapes ilustraes col lema “Comunícate con Pulga”. Pulga ye como llamen a Pelayo los munchos amigos que tienen mesmo él que la so muyer y sofitu incondicional, Paula Corteguera Martínez, natural de Ribeseya, escenariu de munches de les sos aventures marítimes.
Vela, ELA y Pulga. Si fuera un xuegu de palabres discurríu por un espertu en marketing nun diba salir tan redondu. Pero'l venceyu ente los trés términos ye tan real como altruista y operativu: “Esta collaboración naz de munches amistaes y alcordances imborrables a lo llargo de les nueses pelegrinaciones a Santiago. Tratamos dar visibilidá a la ELA y a los que la sufren. Y nada nun atalanto meyor qu'axuntar un retu con otru, cola esperanza siempre d'aportar a bon puertu”.
Estes palabres de Pelayo García adquieren el so verdaderu relieve si se tien en cuenta cómo fueron espresaes: solo puede comunicase “tecleando” lletres col iris de los sos güeyos nuna pequeña pantalla d'ordenador. Por eso l'eslogan “Comunícate con Pulga” naz d'una necesidá vital, de la odisea que significa engardise caldía frente a la incomunicación a la que la ELA somete a bona parte de les persones que la sufren.
Pelayo García tiense autoasignao un cometíu ambiciosu: que'l mayor númberu posible d'enfermos pueda disponer d'un ordenador como'l d'él, que-y permite conectase cola so familia, colos sos amigos y col mundu: “Lo que m'esmolez ye qu'hai muncha xente que nun tien la oportunidá de tener esti sistema, y que lu formen y lu afalen a usar esto”.
Esti oxetivu enfréntase a dificultaes de categoría: “Queremos dar sofitu a los enfermos y a les families que s'alcuentren en situaciones percomplicaes pola demanda económica ascendente que supon esta enfermedá”, asevera Pelayo García, quien define esta iniciativa como “un gritu d'amor a la vida énte una enfermedá dexenerativa mui dura y xeneralmente mui rápida que rique más investigación ya inversión, porque se sabe bien poco del so orixe y naide ta llibre de sufrila”.
Numberosos establecimientos de Ribeseya y Uviéu yá se sumaron a la campaña “Comunícate con Pulga”. “Tamos mui agradecíos y confiamos en que s'incorporen munchos más”, señala María José Álvarez, presidenta d'ELA Principáu.
Entamada pola entidá “NorthMarinas”, la séptima edición de la travesía “El Camín a vela” entama esti vienres, día 24, dende agües franceses. L'itinerariu reproduz per mar el Camín de Santiago y axunta alredor d'un centenar de turistes náuticos que quieren “facer el Camín d'una forma distinta”.
Pa dar respuesta a los pidimientos de los amantes de la navegación a vela y del turismu azul sostenible, los organizadores ampliaron la singladura en cinco etapes, a les que se suma un programa d'actividaes culturales nel que va tar mui presente l'homenaxe que se rinde esti añu al quintu centenariu de la vuelta al mundu de Juan Sebastián Elcano, especialmente nes etapes en País Vascu, onde funciona con fuerza l'asociación d'enfermos d'ELA denominada “DalecandELA”, tamién arreyada a la iniciativa solidaria.
