Digamos que'l grupu “Petit Pop” vuelve con nuevos cantares xusto per onde los “Beatles” marcharon pa siempre: con un conciertu nuna azotea, como aquel yá llexendariu y postreru que dieron los “Fabulous Four” el 30 de xineru de 1969 enriba de los estudios de grabación Apple de Londres. El vídeu del nuevu single d'estos cuatro asturianos fabulosos de la música pa tola familia –Pedro Vigil, Mar Álvarez, Covadonga de Silva y Lara González– tamién pasa nuna azotea, pero de Xixón. Ellí interpreten el tema “Fan de póster”, el primeru de los cantares que va integrar un nuevu discu que yá ta componiendo, a poco y a poco, una banda de fama nacional ente los padres que quieren compartir bona música y conciertos colos sos fíos más pequeños. 

“Fan de póster”, que suena enforma a los “Beatles”, como nun podía ser d'otra manera, “ye un cantar dedicáu al fechu de ser fan, toa una actitú na música; dedicada a estos fans que se dexen llevar pola pasión y pola adoración a los sos ídolos, que pierden los papeles nos conciertos, que glayen y se tiren pel suelu. Y si hai dalgún grupu onde se materializa esi fenómenu son los ‘Beatles’”, esplica Mar Álvarez. Anque a lo llargo de la pandemia “Petit Pop” siguió ufiertando conciertos coles midíes sanitaries riquíes (mázcaru y distancia), agora llega'l momentu de volver a la esencia de les sos actuaciones en directu. “El cantar representa les ganes d'axuntase y pasalo bien, les ganes de ver a la xente xunto escuchando música en directu. Ver a los guah.es cantando y baillando, dando guerra a los acomodadores, ye daqué que ye fundamental nos nuesos conciertos y agora por fin vamos poder volver a eso”, afirma Álvarez, quien amás esplica d'ónde nació la idea de xubise a l'azotea. “Esta Navidá pasada tuvimos viendo la peli de Peter Jackson sobre los ‘Beatles’ y nun lo podíemos creer. ¡Yera como tar viendo un programa de ‘Gran Hermanu’ protagonizáu por ellos! ¡Qué grau d'intimidá!”.

Tolos componentes del grupu.

La música de “Petit Pop” nutrióse de les sos esperiencies doméstiques y familiares. Quiciabes por eso les sos lletres gústen-yos casi más a los padres qu'a los neños. Pero'l tiempu pasó y dalgo pasó tamién: “Los nuesos fíos crecieron y la casa enllenósenos de preadolescentes. Los nuesos discos nútrense de la nuesa vida, tou en clave d'humor y mui gayolero. Pero agora toa esa xente maraviyoso que son los nuesos fíos tán convirtiéndose en persones un pocu distintes. Asina qu'agora cuesta un pocu más componer”, reconoz Álvarez. Los fíos crecen y adquieren otros papeles. Pel momento, Leo Lozano Álvarez, de 13 años, fíu de Mar Álvarez interpreta nel vídeu de “Fan de póster” el papel de Bill Preston, teclista naquel conciertu de los “Beatles”. César Fernández, fíu de Covadonga de Silva, de 12 años pa cumplir 13, fai'l papel de George Harrison. Y nel papel estelar de Yoko Ono, Julia Vigil, la fía de Pedro Vigil.

Mientres siguen componiendo, “Petit Pop” yá tien nueva xira de conciertos. El primeru, el sábadu pasáu en San Sebastián de los Reyes; el día 23, en La Pola Llaviana; el 3 de xunetu, en Llanera; el 23 de xunetu, en Peñafiel; el 11 d'agostu, en Salas; el 14 d'agostu, nel Sonorama, d'Aranda de Duero; el 11 de setiembre, en Corvera; el 7 d'ochobre, n'A Veiga, y el 30 d'avientu, van tar en Xixón.