La natalidá asturiana adelgazó tanto que cualesquier pequeña medría abulta. Pasó nel primer cuatrimestre d'esti añu, onde un espoxigue d'apenes 112 nacencies respecto al mesmu periodu de 2021 pesa un 7,72 por cientu y ye'l crecimientu más gordu d'España hasta abril. L'actualización más recién del Institutu Nacional d'Estadística (INE) da forma a la paradoxa d'esti llugar que mengua l'optimismu con una medría de los fallecimientos del 1,5 por cientu nel mesmu periodu y que sigue liderando con francura les peores cifres de natalidá y mortalidá n'España. Acordies colos datos que l'INE acaba de poner al día al zarru de 2021, la tasa de natalidá –nacíos por mil habitantes– rexistró l'añu pasáu'l so primer espoxique, persele, dende 2011.

Les madres estranxeres. L'últimu datu asitia la tasa en 4,74 nacencies por mil habitantes, la más baxa de les comunidaes autónomes. Por provincies, namás la rebaxen Orense y Zamora, pero hai que conseñar que'l panorama camuda cuando se desglosa la tasa según la nacionalidá de la madre. La tasa ye de 4,11 nacencies si solo se consideren les españoles, pero multiplícase cuasi por trés y xube a 11,38 ente les estranxeres residentes nel Principáu. Esti datu tamién baxa, pero ta llueñe de ser el peor d'España, señal de que l'atracción d'inmigrantes como remediu posible pa la enfermedá demográfica asturiana tien tamién el so venceyu cola natalidá.

Más avieyamientu. Asturies tamién sigue siendo, con Canaries, la única rexón española con una media de menos d'un fíu por muyer –0,95–, y como vien siendo habitual dende los ochenta, lidera lo peor de la tasa de mortalidá, con 13,2 fallecimientos por cada mil habitantes, el segundu datu más altu de la serie. Engordaron coles mesmes en 2021 tolos indicadores que miden l'avieyamientu y nos qu'Asturies sigue siendo ensin esceición líder indiscutible, con un índiz que toca techu nun 231,07 por cientu, lo qu'implica más del doble de mayores de 64 años que mozos de menos de 15, y una tasa de dependencia que rexistra 61 habitantes dependientes por cada cien potencialmente activos. La edá media de la población xube a 48,78 años, otra vuelta'l tope históricu y el valor más eleváu del país.

Más matrimonios. Los datos del INE revelen tamién l'espoxigue de los matrimonios en 2021 tres el paréntesis del añu de más alta incidencia de la pandemia. Les uniones xubieron dende les 1.807 de 2020 hasta 3.198, un valor que casi iguala les 3.255 de 2019.