El Castelón de Cuaña, xoya patrimonial de la Edá del Fierro, va acoyer esti branu una nueva intervención arqueolóxica que, amás de permitir percanciar nuevos datos de la fundación d'esti pobláu, tien por oxetivu “ameyorar la percepción que'l visitante tien del xacimientu”. Va actuase na considerada puerta oriental del castru, la última que tuvo n'usu, y per onde anguaño aporten los cientos de visitantes que cada añu s'arimen a esti popular xacimientu. 

Los trabayos, promovidos pola Dirección Xeneral de Patrimoniu y pol Muséu Arqueolóxicu d'Asturies, tán incluyíos nel denomináu “Plan director pa la xestión del patrimoniu castreñu n'Asturies”, qu'acaba d'entrar a valir. La escavación prevista va desenvolvese a finales del branu, polo que ye posible qu'a principios de la seronda'l castru tenga yá nuevos elementos a la vista que “apurran nuevos instrumentos pa entendelu”. 

L'arqueólogu Ángel Villa empobinó'l sábadu pasáu una ruta pel castru siguiendo los pasos de los primeros que lu investigaron y documentaron. El percorríu, promovíu pol Muséu Arqueolóxicu dientro de la Selmana Europea de l'Arqueoloxía, tamién fixo una parada na zona que va ser frutu de la próxima escavación y que “agora pasa un tanto desapercibida”. Nesti enclave nun s'escava dende l'añu 1991, polo qu'hai bones mires al respeutu de la información científica que pueda pescanciase. 

N'esencia, cuéntase con “allargar la escavación realizada na zona de la puerta oriental, una puerta qu'en principiu se considera construyida en dómina romana, pero que ta acomuñada a otros elementos defensivos qu'abulten anteriores, ente ellos el fueyu”. Esplica Villa qu'hai delles dudes al respective de si'l fueyu ye contemporaneu a la puerta o foi “como paez” anterior. 

“Vamos intentar establecer cuála ye la relación ente dambos y sobremanera por una cuestión importante y ye que, xeneralmente, la datación de los elementos defensivos pueden averanos permuncho al momentu de primer usu, a la fundación de los asentamientos”, añede'l profesional, de la qu'ufierta detalles d'esti camín d'accesu, pavimentáu, y que dexaba enfusase nel pobláu al traviés de la muralla. Ente los oxetivos d'estos trabayos ta tamién determinar hasta cuándo tuvo vixente la que se considera la última entrada operativa del pobláu.

La zona na que se va a escavar, xunto al accesu de los visitantes al xacimientu cuañés. | Rep. de T. C.

Esta ampliación de la zona visitable del castru nun va ser l'últimu cambéu que se cuenta facer en El Castelón. Ello ye que Cultura ta tramitando la obra pa remocicar l'aula didáctica del xacimientu, con unos conteníos que quedaron obsoletos. El director de Patrimoniu, Pablo León, anunció'l pasáu abril que los nuevos conteníos yá tán definíos. 

Hai que dicir que'l citáu Plan director pa la xestión del patrimoniu ye mui críticu cola situación actual d'una de les xoyes arqueolóxiques d'Asturies, que la so zona más antigua ta datada nel sieglu VI enantes de Cristu. Nesti sentíu, el documentu rescampla la necesidá d'intervenir en delles árees como'l casu de los horarios d'apertura del xacimientu que, señala, “son claramente insuficientes pa la demanda esistente”. 

Nel documentu tamién se refieren como “insuficientes” les xeres de siega y roza, pues “llargos periodos del añu la vexetación coloniza d'un xeitu mui poco afayaízu amplies zones del castru, incluyíos los sectores visitables”. Esti estremu pudieron comprobalu los participantes nes visites empobinaes d'esti día. 

Al respective de les zones visitables, el plan director tamién plantega la necesidá d'estudiar les posibilidaes d'acabar con estes restricciones. Nel documentu indícase qu'hai zones anguaño vetaes que dexaríen entender meyor el xacimientu como ye'l casu del recintu sacru, nel que se disponen les saunes, mesmo que les fortificaciones y el recintu cimeru o acrópolis.