La industria, cola siderurxa, la metalurxa y la construcción naval a la cabeza, alicó la economía asturiana depués del duru golpe de la pandemia. Mentanto 2021 los crecimientos mensuales de la cifra de negociu del sector fabril asturianu llegaron hasta'l 72% al respective de 2020, pero esti añu les tases moderáronse. N'abril –últimu datu espublizáu pol Institutu Nacional d'Estadística (INE)– la crecedera foi del 14,4%. La moderación de la industria en 2022 coincide col despegue de los servicios, qu'a lo llargo del añu pasáu entá se vieron llastraos poles llimitaciones decretaes pol covid. N'abril, la so cifra de negociu incrementóse'l 20,9%. El sector terciariu yá crez más que'l secundariu dientro de la recuperación económica d'Asturies. 

El despegue de los servicios n'Asturies tamién se nota nel empléu. Según los datos del INE, la medría del 20,9% na cifra de negociu n'abril vieno acompañada d'una medría del 4,4% na ocupación del sector. Sicasí, la mayor parte del crecimientu nos servicios ta sofitáu sobre la rama de la hostelería, que n'abril, cola Selmana Santa, entamó la so campaña turística, que se va allargar hasta setiembre. N'otres rames, como la del comerciu, espérase un bon branu, pero nun hai optimismu con respectu al global del añu. 

“Nun nos podemos engañar, dos meses bonos de branu nun compensen un añu d'inseguridá y si daqué ezmoqueta nes empreses de comerciu minorista ye la inseguridá de nun saber qué va pasar cola so vecería y como va responder pa la próxima temporada. La seronda preséntase como un camín ribayu y ensin brúxula que va depender de circunstancies tan ayenes a la nuesa capacidá d'actuar ya influyir que provoquen congoxa”, señaló Carmen Moreno, xerente de la Unión de Comerciantes del Principáu d'Asturies, que demandó midíes de sofitu del Gobiernu rexonal pal curtiu plazu y propunxo bonos de compra subvencionaos. “Si nun actuamos nes necesidaes al curtiu plazu nun vamos tener empreses a les que dixitalizar, potenciar, ayudar y facer sostenibles a mediu y a la llargu plazu”, señaló Moreno.

El Principáu, única rexón na que baxaron los salarios nel añu del covid

Asturies foi la única rexón na que baxaron los salarios en 2020, l'añu de la pandemia del coronavirus. El descensu mediu foi del 1,4%, según indiquen los resultaos definitivos de la Encuesta Añal d'Estructura Salarial que publicó esti día l'Institutu Nacional d'Estadística (INE).

El sueldu mediu de los asturianos foi en 2020 de 24.527 euros, solo per detrás del de los vascos (30.224 euros), madrilanos (28.826 euros), navarros (27.995 euros) y catalanes (27.100 euros) y per debaxo de la media n'España (25.165 euros)

Asturies foi la única rexón que rexistró una cayida de salarios (d'un 1,4% frente al incrementu mediu del 3,2% n'España) y foi, depués de Navarra, la que tuvo una mayor resquiebra de xéneru. N'Asturies los homes recibieron de media un sueldu de 27.948 euros en 2020 mentanto que les muyeres ganaron 21.308 euros, una diferencia que s'esplica en parte pol fuerte pesu de la industria na rexón, sector d'altos salarios y con mayoría d'homes.

A nivel nacional, ún de cada cinco trabayadores, el 19,4%, tenía un sueldu inferior al salariu mínimu interprofesional (SMI) en 2020 (añu nel que xubió un 5,5% hasta los 950 euros en 14 pagues), una situación que, nel casu de les muyeres, algamó casi al 27,5%. La ganancia media añal femenina solo suponía'l 81,3% de la masculina, una diferencia qu'amenorga si se consideren puestos de trabayu asemeyaos (mesma ocupación, tipu de contratu o tipu de xornada). Si se tienen en cuenta los salarios más elevaos, el 3,7% de los homes ganaba siquier cinco vegaes el SMI frente al 1,9% de les muyeres, señala l'INE, qu'atribúi esta desigualdá al mayor porcentaxe de muyeres nel empléu a tiempu parcial.

Por sectores, los salarios de la hostelería fueron los únicos que baxaron, el 2,9 %.