N'apenes unos díes amburaron na Sierra de la Culebra de Zamora más de 30.000 hectárees, la metá arbolaes, no que se considera la mayor quema desque hai constancia nos rexistros. Los ganaderos d'Asturies consideren qu'esti branu puede haber na rexón quemes mui asemeyaes y piden que'l Principáu autorice más quemes controlaes. Y ye que “el monte ta salvaxe, enllenu de combustible, la gasolina ta puesta por qu'ambure per dayures”, alvierte Antonio García, rexidor de los pastos de los Picos d'Europa. 

Los meteorólogos esperen n'Asturies que l'escenariu cálidu sía'l más probable, con un 60 por cientu de probabilidá. Tocantes a les precipitaciones, cuenten con un escenariu secu. Nel oriente asturianu, la posibilidá de que sía un branu cálidu ye entá mayor, algamando'l 70 por cientu. Hasta setiembre, amás, hai una gran probabilidá de que la temperatura medio s'atope nos terciles calidu y secu en toa España, teniendo como referencia'l periodu entendíu ente 1981 y 2010. 

David Barraso, decanu del colexu d'inxenieros forestales d'Asturies, considera que na rexón ye más difícil qu'haya esti tipu de quemes por mor de la meteoroloxía húmeda, pero la orografía asturiana ye un factor que complica la estinción, lo que podría provocar fueos desamarraos. La situación, indica, nun ye tan grave como nel Mediterráneu, pero agrávase por “l'abandonu del monte”. Barraso alvirtió va un tiempu de la inesistencia de planes de prevención pa les localidaes más cercanes a mases arbórees.

L'Occidente, más espuestu

Eso sí, alvierte de que nel occidente de la rexón pueden desamarrase episodios asemeyaos al de la sierra de La Culebra. Va unos díes hubo un episodiu nel conceyu de Ibias, con cuatro quemes nel mesmu conceyu, ún d'ellos, el d'Alguerdo, foi complicáu d'apagar. El gran problema d'estos fueos, resalta Barraso, ye que nun hai dispositivu que pueda apagalos por mor de la so magnitú. Nel fueu de La Culebra, Castiella y Lleón tuvo que pidir ayuda a otres rexones, incluyida Asturies, pa poder encarar la quema. La solución nun ye otro qu'una mayor inversión en prevención, resalta Barraso, una y bones la estinción ye mui complexa. 

Los ganaderos asturianos avisen d'un branu con munches quemes porque'l monte ta “abandonáu”. José Peláez Fernández, de Caneiru (Valdés), diz que'l monte ta enllenu maleza, igual que les marxes de les carreteres y los accesos a los pueblos. “El monte ta salvaxe”, sentenció, “y esta agua que ta cayendo estos díes nun fai más qu'espoxigar el monte”. Si a eso s'axunta la seca de los últimos meses, “con que caya una cerilla, va amburar tou”, avisó. Y tiró una alvertencia a la sociedá asturiana y al Gobiernu rexonal: “Si sume'l sector ganaderu, nos pueblos va crecer la carba y les posibilidaes de que se produzan quemes desaforaes. Nun veo a naide llimpialo”.

Mala xestión del monte

El ganaderu Antonio García avisó de qu'hai posibilidaes de que se produzan quemes como la de la Sierra de la Culebra “pola mala xestión del monte”. “Alcuérdome va unos años cuando podíemos facer quemes controlaes, matu a matu”, resaltó. Indicó per otru llau que La Culebra “ye una zona llobera”. Había ganadería hasta qu'introducieron el llobu, asegura. “Sumió la reciella, que llimpiaba de maleza'l monte. Eso va pasar equí”, alvierte. “Si esta última fola de calor nos garra n'agostu o setiembre, tuviéramos una quema bien grande”, asegura García. La política de “prohibición”, prosigue, nun funciona. Y alcuérdase de cuando quemaben maleza na zona de los Llagos, mirando de nun acabar colos árboles. “La gasolina ta puesta en monte, hai muncha materia orgánico en monte. Danse tolos requisitos pa una gran quema. Nun te dexen tocar nin un árbol”, alvierte Antonio García. Y pide que se respeten los usos “antiguos”. 

Y nun hai qu'escaecer que l'Axencia Estatal de Meteoroloxía avisa de qu'esti branu va ser más calorosu de lo normal. El paraísu natural anda en riesgu d'amburar.