José Ferrero y Miguel Galano, con más de trés décades de trayectoria artística, lleven cuasi'l mesmu tiempu intentando rematar una idea que vio la lluz esti domingu pasáu. Nel Muséu Evaristo Valle esponen «Viajes de ida y vuelta», una obra tresversal, coles fotografíes de Ferrero y los dibuxos de Galano, so un mesmu procesu de composición, ensin siguir un orde y técnica común. Pero con una resultancia artística sorprendente.
«Cuando vemos les pieces, munches vegaes nun tenemos nin claro la parte que fiximos caún, nun sabes si una parte ye fotografía o pintura, nin lo que se fixo enantes o depués. Y esi ye l'encantu», resalta Ferrero. «Fiximos delles intentones, pero tardamos en sacar daqué que nos prestara a los dos», indica Galano, sobre'l fin d'un procesu artísticu que s'allargó trés décades. «Esta esperiencia ye mui poco común, de fechu nun conocemos antecedentes, sí de collaboración ente pintores», sorraya.
El procesu de creación naz d'un papel en blancu. De cuando en vez ye José Ferrero'l qu'entama'l trabayu sobre la fotografía, primero de pasar a Miguel Galano por que complete la obra sobre coles, oliu, guache o la técnica pictórica más amañosa. Otres, sicasí, ye Galano'l qu'entama'l trabayu, por que lu remate Ferrero. Inclusive en más d'una ocasión esi viaxe d'ida y vuelta que planteen muévese inda más. «Facémos-y más retoques hasta que tamos contentos del tou», cuenten. «Dende un puntu de vista creativu ye una esperiencia fantástica», añeden.
La temática de «Viajes de ida y vuelta» xira alredor del paisaxe. Nin Ferrero nin Galano tienen el propósitu de reproducir localizaciones concretes, sinón que busquen afondar nel so potencial evocador, con cierta atmósfera de señardá. “Son escenes qu'aluden a esperiencies que cuasi de xuru esperimentaron por separáu y que munchos de los espectadores van poder percibir como de so”, afirmen.
