Leopoldo Alas Clarín y Emilia Pardo Bazán fueron amigos hasta que la escritora coruñesa intentó ingresar na Academia Española. Conociérense en 1881, y en 1883 Clarín escribió'l prólogu de “La cuestión palpitante”, ún de los llibros de Pardo Bazán. Dambos caltuvieron correspondencia sobre los sos asuntos lliterarios, pero d'esto nun había constancia documental hasta que va unos meses la casa de subastes Soler y Llach, de Barcelona, se fixo con un par de cartes, dambes roblaes por Clarín y empobinaes a l'autora de “Los Pazos de Ulloa”. Dataes en 1887 y 1889, traten sobremanera de lliteratura y amuesen una gran familiaridá, hasta'l puntu de que na postrera Clarín confiesa a la so amiga: “Los nervios taenme estos díes mediu llocu”. 

La Conseyería de Cultura adquirió les dos cartes, nun llote, el 513 de la Casa Soler y Llach, que se completa con una tercer misiva, de 1880 y deteriorada pel agua, que l'abogáu y periodista Juan Manuel Ortí y Lara unvió a Pardo Bazán. Les trés cartes fueron mercaes por 550 euros; les del autor de “La Rexenta” van incorporase a los fondos de la Biblioteca d'Asturies, qu'alluga la meyor colección clariniana del mundu. 

Na primer carta, la de 1887, Clarín cuenta a la so amiga qu'acaba de lleer “d'una tirada” el tercer volume del so llibru “Revolución y Novela en Rusia” y dedíca-y grandes emponderamientos: “Güei yá-y doi a Vd. tol valor que quiciabes siempre tuviera, pero que yo nun viera”. La segunda ye más estensa y denota mayor enfotu. 

Anque nun trescendió la procedencia d'estos documentos, Pardo Bazán bien podría guardalos nel so palaciu de Meirás y, como asocedió con munchos otros, perdese cuando la propiedá foi ocupada polos Franco.