Consideráu polos hosteleros como'l “pistoletazu de salida gastronómicu” del branu na ciudá, les xornaes “Xixón sabe a mar” tornaron dende'l vienres pasáu y hasta'l día 3 de xunetu con 28 restaurantes adscritos a un eventu que busca potenciar el consumu del pescáu y el mariscu locales. La cita, presentada esti día, xurde de la collaboración d'Otea y el Conceyu de Xixón y celebra esti añu la so sesta edición. Los sos organizadores consideren que se trata d'un certame “consolidáu” nuna ciudá qu'hasta va unos años “nun sacaba tol provechu posible del mar”. “Quiciabes hasta agora nun supimos vender tan bien el nuesu productu del mar como n'otres ciudaes. Pero ye lo meyor que tenemos”, señaló Ángel Lorenzo, presidente local d'Otea. 

Como yá vien siendo habitual, “Xixón sabe a mar” dexa total llibertá a los establecimientos collaboradores pa presentar los platos y tapes que consideren, anque tienen de centrase en dalgún pescáu o mariscu representativu del Cantábricu. Munchos restaurantes yá dieron a conocer les sos apuestes. Tires de bacaláu rebozaes, merluza a la sidra, moxones n'escabeche y canelones de bugre son dalgunos de los platos yá presentaos a la campaña. “Polo xeneral, la idea ye apostar pola cocina tradicional que nos facíen les nueses madres y les nueses güeles”, anunció Lorenzo, qu'espera que les xornaes sirvan pa impulsar un sector que tuvo que pasar per “dos branos bien difíciles” pol contestu de pandemia: “Pretendemos que la xente sala a la cai, que yá tien ganes, ya incentivar el consumu del productu asturianu, tan bonu”. 

El conceyal Santos Tejón, pela so parte, cree que “Xixón sabe a mar” enmárcase na mesma idea de base que tien “Xixonomía”, la campaña municipal de promoción turística. “La gastronomía forma parte del nuesu estilu de vida y tien un papel vital na promoción económica de la ciudá. Ye un valor añedíu”, defendió. A la presentación d'esti día allegó tamién Graciela Blanco, viceconseyera de Turismu, qu'apuntó qu'estes xornaes pueden enmarcase tamién na campaña rexonal “Asturies, cocina de paisaxe”. “Tenemos d'asitiar la gastronomía como un atractivu turísticu. N'Asturies hai un productu de peralta calidá y naguamos por tener un mui bon branu n'Asturies”, destacó. 

“Xixón sabe a mar” cuenta, amás de colos 28 restaurantes, con dos hoteles que llanzaron ufiertes especiales por cuenta de estes xornaes. Les apuestes de cada establecimientu pueden consultase nes webs d'Otea y d'Escapada Asturies y al traviés de los códigos QR de los carteles y folletinos de promoción yá repartíos pela rede hostelera de la ciudá.