Trece pigargos europeos procedentes de Noruega llegaron esti día a Asturies y van vivir dellos meses nun recintu especial cerca del pueblu de Pimiango, en Ribadeva. Tres un periodu d'aclimatación, a finales d'esti branu, van ser lliberaos y van xuntase colos otros seis exemplares supervivientes de la suelta del añu pasáu (ún morrió lletrocutáu en Francia). El pigargo, l'águila más grande d'Europa, figura nel Llistáu d'Especies Desaniciaes n'España, aprobáu n'agostu de 2018, qu'inclúi a animales y plantes que pueden ser oxetu de proyectos de reintroducción autorizaos poles alministraciones competentes, coles mires de recuperar la biodiversidá perdida.

Les aves lliberaes n'ochobre train un emisor GPS que permite siguir los sos movimientos. Nesi tiempu moviéronse enforma per tola cornisa cantábrica, Pirineos y la metá norte de la Península Ibérica. «Un bon indicador del proyectu ye que casi tolos pigargos que lliberemos l'añu pasáu venceyáronse en mayor o menor midida a la redolada de lliberación, lo que diz muncho de les posibilidaes de que nun futuru se reproduzan nesa zona, que ye'l nuesu oxetivu», esplicó Ernesto Álvarez, presidente de Grefa.

El Proyectu Pigargo, impulsáu pola asociación conservacionista Grefa, cuenta col sofitu económicu del Ministeriu pa la Transición Ecolóxica y la collaboración del Principáu, el Conceyu de Ribadeva, el Gobiernu de Cantabria, la empresa EDP y dos entidaes noruegues. L'oxetivu ye crear una población reproductora de pigargo n'España. L'añu pasáu entamó una primer fase esperimental del proyectu, de dos años de duración, a la fin de la que se van valorar los resultaos y, si salen positivos, va continuase cola lliberación añal d'hasta venti exemplares polo menos cinco años más.