Cultura constituyó la Rede de Normalización Llingüística del Principáu, con asistencia de representantes de 21 conceyos que tienen Serviciu de Normalización Llingüística, y tamién de la Universidá d'Uviéu. L'oxetivu del nuevu organismu ye reforzar la coordinación ente l'Alministración autonómica y los conceyos pa promover l'usu del asturianu y del eonaviego nel so territoriu.
La primer xunta de la Rede, qu'aconceyó na Llaboral, sirvió pa constituyila formalmente y ufiertar información sobre les actividaes desenvueltes polos distintos servicios de normalización llingüística a lo llargo d'esta llexislatura y sobre'l tipu de collaboración que puede establecese ente'l Principáu y la Rede.
La Rede de Normalización supon, según la Conseyería de Cultura, "el preséu llegal necesariu pa encauzar oficialmente la collaboración que de normal caltien l'Alministración autonómica colos distintos conceyos n'asuntos llingüísticos. L'órganu ta llamáu a desempeñar un papel fundamental na regulación territorial de la política llingüística, na creación de nuevos servicios normalizadores, nel caltenimientu de los que yá tán funcionando y na coordinación y desenvolvimientu de l'actividá de toos ellos". Na constitución nun faltó la conseyera de Cultura, Política Llingüística y Turismu, Berta Piñán.
Casi la metá de los conceyos tienen anguaño unidaes alministratives que s'ocupen de la normalización de les llingües y dan serviciu a más de la metá de la población del Principáu, en dellos casos con servicios propios y, n'otros, acomuñaos con más conceyos.
La regulación de la Rede de Normalización Llingüística representa pal Gobiernu d'Adrián Barbón, "un pasu más nel compromisu por dinamizar l'impulsu y la recuperación del nuesu patrimoniu llingüísticu. La collaboración colos conceyos demostró que la xestión próxima a la ciudadanía que desenvuelven los servicios de normalización ye una ferramienta amañosa pa la promoción del asturianu y el eonaviego", dicen.
La estructura de la Rede Normalización Llingüística entamángase nun Conseyu de la Rede que va tener una presidencia y vicepresidencia que van ocupar, respectivamente, les persones responsables de la conseyería y de la dirección xeneral con competencies en materia de política llingüística y un númberu ilimitáu de vocalíes que van permitir contar con representantes de cada alministración pública o entidá que s'axunte. Nun van percibir retribución nenguna pola so participación.
Cuéntase cola creación d'una comisión técnica constituyida por personal técnico de los respectivos servicios y de l'Alministración del Principáu. A esta comisión correspuénde-y realizar estudios, proyectos, actividaes, programes, planes y propuestes en materia de política llingüística, pa lo que va poder formar los grupos de trabayu que considere necesarios.
Docentes d'asturianu
Per otra parte, nel Parlamentu asturianu la conseyera d'Educación del Principáu, Lydia Espina, comprometióse a siguir buscando víes que permitan dar estabilidá ya igualdá de condiciones qu'al restu de docentes a los más de 250 maestros y profesores d'asturianu y eo-naviegu qu'imparten clase na rede pública, dalgunos dende fai 38 años. Énte la Comisión d'Educación de la Xunta Xeneral del Principáu, Espina dixo, sicasí, que'l Ministeriu trancó toles puertes a la creación de la especialidá docente del asturianu, incluyíes les propuestes polos catedráticos Xavier Arzoz y José Manuel Pérez nel so informe al respeutu de la oficialidá de les llingües propies d'Asturies.
Nesti estudiu plantégase la posibilidá de que, ensin que l'asturianu tenga reconocíu'l so calter de llingua oficial, el Gobiernu dea en crear una especialidá d'asturianu acutada al ámbitu autonómicu o, como vía alternativa, que cree un cuerpu docente rexonal pa esi colectivu.
Sicasí, la conseyera señaló qu'en toles xuntes que caltuvieron col Ministeriu d'Educación pa ponese con estes cuestiones dixéron-yos que "les puertes tán trancaes" y que nun hai alternatives a la creación d'esa especialidá que nun pasen pola reconocencia de la oficialidá del asturianu.
Más tovía, nel casu de que'l Gobiernu autonómicu diera'l pasu pa crear una especialidá válida pal ámbitu rexonal ensin esa reconocencia, el ministeriu díxo-yos que recurriría dicha decisión.
"Nun hai muncho marxe de maniobra", reconoció la conseyera énte la entruga treslladada esti día pola diputada de Podemos Nuria Rodríguez, que yá s'interesó por esti mesmu asuntu nel plenu parlamentariu de va unes selmanes.
Pa la diputada morada, énte'l procesu d'estabilización abiertu pal personal docente ye importante tener instrumentos que permitan al profesoráu d'asturianu tener los mesmos derechos y que nun haya agravios comparativos.
Énte esta situación, la conseyera reconoció que siguen pescudando pa buscar alternatives y que tán a la espera de respuesta por parte del Conseyu Consultivu a la cuestión que sobre esti asuntu-yos encamentaron.
