Uviéu ta más cerca que nunca de tener una amplia rede de cargadores de coches eléctricos. La xunta de gobiernu local aprobó'l concursu p'axudicar la instalación d'hasta 40 electrolineres que se van asitiar nes cais, en distintos puntos de la ciudá. Anque nun s'establez un preciu de llicitación, el Consistoriu va esixir a les empreses interesaes l'allugamientu d'un mínimu de 30 de los 40 llugares escoyíos pa esti tipu d'equipamientos que la so instalación, con un costu valoráu de casi 600.000 euros, va correr al cargu de la compañía axudicataria. 

La concesión, que va tener una duración máxima de 10 años, va suponer pa los inversores tamién el pagu d'un canon añal de 640 euros pola ocupación de la vía pública por caún de los dispositivos asitiaos, esto ye, unos 25.000 euros al añu, amás d'asumir el caltenimientu y l'esplotación de los surtidores d'enerxía eléctrica.

La conceyalía d'Infraestructures y Movilidá estableció como criteriu p'allugar los puntos de recarga la cercanía a edificios públicos como hospitales, instalaciones deportives, educatives o polígonos industriales y empresariales. Concretamente, el centru va acoyer diez d'estos puntos de recarga; trés va haber en Pumarín y La Corredoria; los barrios que van tener dos van ser Buenavista, Ciudá Naranco, Cualloto, La Florida y Montecerrao. Y van disponer d'una sola electrolinera Tudela Agüeria, L'Argañosa, El Cristu, La Ería, Olivares, Lluniego, Oteru, San Cloyo, La Tenderina, Ventanielles y Pando, amás de la estación d'autobuses y el parque d'Iviernu. 

Esti contratu llega pa entamar una de les actuaciones afalaes dende la conceyalía de Nacho Cuesta, cola cuenta de tresformar la movilidá local p'hacia un modelu muncho más sostenible y respetuosu col medioambiente. Amás de la rede de cargadores de coches, el Consistoriu, al traviés de la conceyalía de Seguridá Ciudadana, trabaya nel desenvolvimientu d'una rede de 100 kilómetros de carrilles-bici que va empezar esti mesmu añu pela zona de La Florida y Les Campes. Coles mesmes, no que va de mandatu asitiáronse 150 aparcabicis repartíos pol cascu urbanu y tase peracabando un proyectu pa llantar un sistema de bicicletes d'arriendu.

Autobuses

Nel casu concretu de los cargadores, el Conceyu va contar con 3,6 millones d'euros de fondos Next Generation de la UE p'habilitar una rede de cargadores p'autobuses del serviciu municipal de tresporte urbanu eléctricos, al traviés d'una llinia d'ayudes impulsada pol Ministeriu de Tresportes. L'equipu de gobiernu municipal pidiera otros 5 millones d'euros pa financiar la compra d'autobuses eléctricos, pero esi proyectu quedó fuera d'esta primer convocatoria d'ayudes, anque tiense enfotu en poder siguir optando a futures convocatories pa completar el tresformamientu de la flota municipal, algamando l'oxetivu de cero emisiones nos próximos años.