Los datos d'acosu escolar n'España son prietos (súfrenlu ún de cada cuatro neños), pero entá lo son más si se pon el focu nos alumnos superdotaos. Un estudiu nacional lideráu pola Universidá Internacional de La Rioja (UNIR), asoleyáu esti día, revela que la metá de los adolescentes con altes capacidaes sufrieron "bullying" y que ye trés vegaes más probable qu'a un estudiante intelectualmente superior al restu se lu victimice. El motivu, afirmen los espertos: castígase lo distinto. 

Nesta investigación participaron 449 estudiantes con altes capacidaes de tol territoriu nacional, ente ellos los d'Asturies al traviés de l'asociación APADAC. Nun ye la única aportación asturiana al estudiu, una y bones l'investigador principal ye'l psicólogu afincáu na rexón Joaquín González Cabrera, que dirixe'l grupu de Ciberpsicoloxía de la UNIR. "Ye muncho más frecuente la victimización ente iguales cuando los neños traen singularidaes como son les altes capacidaes", esplica l'espertu. En concretu, y según recueye'l trabayu, un 50,6% puede sufrir acosu escolar dientro d'esti colectivu frente al 27,6% de los alumnos non superdotados. Coles mesmes, l'estudiu reflexa qu'esti grupu d'adolescentes ye susceptible de carecer mayores niveles d'estrés, ansiedá y depresión por aciu del "bullying". 

¿Por qué pasa esto? Joaquín González Cabrera tien clara la respuesta: "Cualquier alumnu que tenga una diferencia al respective de l'enclín xeneral del grupu tien más riesgu de sufrir violencia". Yá sía por tener altes capacidaes, por carecer un trestornu del espectru autista, por venir d'otru país, por tener una orientación sexual distinta... "Sigue viéndose que lo distinto nun da valor, nun da color, nun da guapura, y representa una amenaza, porque nesti casu los alumnos con altes capacidaes presenten característiques que'l grupu mayoritariu nun tien", cavilga'l psicólogu. Detrás d'ello ta la teoría de la identidá social y la sensación que tienen los neños de "pertenencia a una clase, de formar parte de 1u de la ESO A por poner un exemplu". 

La solución, diz Cabrera, ye atayar la violencia "en cualesquier de les sos manifestaciones y en cualesquier de los grupos" a base d'educación. "Tamos centrando nos alumnos d'altes capacidaes, pero equí nun hai datu bonu. Asina qu'hai que trabayar dende les aules pa tornalo llamando a respetar lo distinto, fomentando la empatía emocional...", señala l'investigador, que ye ún de los mayores espertos d'España en nueves tecnoloxíes y adolescentes. En total, nesti estudiu, nel que tamién collaboró la Universidá del País Vascu, participaron 449 alumnos diagnosticaos con altes capacidaes y 950 ensin elles de 14 centros de siete comunidaes autónomes. Esto ye, casi 1.400 estudiantes. Nel trabayu xugaron un papel clave casi 50 asociaciones. "APADAC, d'Asturies, tuvo una participación perbona; ensin estes asociaciones nun fuere posible'l trabayu, yá que ye difícil que nos centros te señalen a esti tipu d'alumnáu", asegura Joaquín González Cabrera. 

Según families y espertos na rexón, los casos d'acosu escolar nun dexen de xubir y enriba n'edaes cada vez más moces. La mesma conseyera d'Educación, Lydia Espina, dixo esti mes que nel Principáu detectaron "una llixera xubida" de los casos y que por ello trabayen na actualización del protocolu actual y van incrementar la formación a directores.