"Hai que dedicá-y mayor atención a la ciberseguridá, güei yá nun s'asalten bancos con un mosquetón, sinón dende casa, col furtu dixital, que ye más fácil y seguro; los ataques con darkmail comprometen cualquier tipu de serviciu públicu", diz Manuel Blanco Parajón, sierense que foi escoyíu, per última vegada, por que cumple 25 años, pol Institutu Nacional de Ciberseguridá (Incibe) como integrante del equipu español que va participar nel Desafíu Européu de Ciberseguridá (European Cyber Security Challenge) que se va celebrar en septiembre en Viena, al que van allegar los meyores "hackers" de 28 países.
Blanco entró nesti mundu cuando tenía 12 años, dempués de que daquién-y robara la cuenta mentanto xugaba a un videoxuegu online. De forma autodidacta decidió conocer tolo que tien que ver cola ciberseguridá y aprender a programar. Güei ye inxenieru informáticu, llicenciáu pola Escuela Politécnica de Xixón, especialista n'esplotación de software ya inxeniería inversa –escribe pequeñes pieces de códigu p'afayar les vulnerabilidaes de los sistemes–, y ún de los meyores "hackers" d'España, qu'axunta a los sos cobocimientos descomanaos una infrecuente capacidá de tresmitir.
Lo primero una aclaración: los "hackers", diz, son tolo contrario d'un ciberdelincuente. Son especialistes en ciberseguridá que lluchen precisamente contra'l malware y el darkmail qu'infecta los sistemes mesmo públicos como privaos, causando millones de perdes.
Blanco yá participó nel equipu en 2017, ganando la competición, celebrada en Málaga. Y depués tamién en 2018 y 2019, con un paréntesis en 2020. L'equipu fórmenlu diez titulares y cinco suplentes. Pa esti sierense de Pañeda Nueva, la cita de Viena "ye un foru de promoción de talentu, pa que los meyores ‘hackers’ socialicen y se pongan a preba" con distintos retos, como la esplotación de software, la criptografía, el hacking web o l'analís forense. Trés mentores –Carlos Polop, Daniel Púa y Álvaro Díaz– que formaron parte de la selección n'ediciones anteriores van sofitar a los miembros del equipu na so preparación pa la competición.
